Friday, October 29, 2010

"ليلة القبض على ام تفيدة"

http://givingmylife.files.wordpress.com/2008/11/two-face.jpg
طول عمري كنت اقول على نفسي ان انا بني ادم محترم بسمع الكلام وعلى خلق ايون متربية على الفضيلة ولا ممكن افكر اعمل حاجة غلط! ده انا كنت شاربة مقلب في نفسي يا جدعان وكنت هوديني في داهية والامور قلبت سباغيتي خالص!!
طبعا محدش فاهم حاجة ولا انا الصراحة اصل الموضوع خرج عن السيطرة ولسه مافوقتش من الصدمة!
طيب انا اتكل على الله واعترف بقى...
من قيمة شهرين كده جالي عرض عمل كمستشارة في احدى الوزارات الحكومية بدوام جزئي والمرتب معقول قولت فرصة اجرب الميري وهو خبرة تنفع للزمن.. ورغم اني ندمت على القرار العبيط ده ندم شديد بعد يومين بس من بداية الشغل لكن زي بعضه واقنعت نفسي ان كل شيء جديد فيه صعوبات في بدايته. وفعلا الامور ابتدت تتحسن بعد فترة التعود وخدت على اسلوب الشغل والروتين الحكومي الجامد وكل شيء ماشي حسب الاجندة.. وماكنش فيه مشكلة لحد ما اختلفت انا ونفسي وبقينا شبه دكتور جيكل ومستر هايد!
الادارة بعتت ورايا وطلبوا مني ادخال بعض المعلومات المتعلقة بشغلي على الداتا بيس بتاعة الوزارة طبعا ده اجراء روتيني وكل موظف بيعمله وعلشان اقدر استخدم الموقع تبع الوزارة لازم الموظف المختص يعملي يوزر وصلاحيات على الموقع ومش عارفه لحسن حظي ولا لسوء حظي الموظف ده طلع واحدة ست. كل ما انزلها المختبر تقولي انها مشغوله وتعاليلي بكرة وبكرة ده مابيجيش في الوزارة دي ابدا! 
يوم تعملي يوزر من غير صلاحيات ويوم تدخل بياناتي غلط وتطلعني من عيلة تانية خالص ويوم تستخبى مني تحت الترابيزة حاجة غريبة موظفين الحكومة دول..
المهم بقى في اخر الشهر نزلتلها وانا مصمم انها تزبطلي بياناتي وكالعادة اول ما شافتني ازبهلت وبصتلي ببراءة وقالت هو احنا ما خلصناش
لا ما خلصناش لسه الصلاحيات علشان اقدر ارفع المعلومات المطلوبة
طيب تعالي في ريحي
بصيتلها بشك اصلها لم تبدي اي مقاومة او اعتراض زي العادة
ممكن بس اعمل تلفون الاول
اه طبعا طبعا براحتك خالص.. اعمل ايه مغلوب على امري وعاوزه اخلص
وطبعا استمرت المكالمة عشر دقايق مابين حماده كان سخن امبارح وماراحش الامتحان والبنت كانت مع باباها وبرضه ماخدتش الامتحان ويناسبك بكرة لا انا ممكن اجيبهملك اي وقت.. وجوزي خد العربية يغيرلها زيت!
اللهم طولك يا روح انا اتأخرت عن شغلي وخلاص هيجيلي شلل وهي ولا كأني هنا.. واخيرا خلصت المكالمة ودخلت للموقع وابتدت تدخل البيانات النت كان واقع خالص والشبكة بتقطع وكل فين وفين عقبال ما تحمل صفحة وانا اتأخرت طبعا وهي ملت بقى فطلعت جبل ورق وابتدت تملي حاجات غريبة ورموز انا طبعا عملت عبيط ومش فاهمة وهي تحمل صفحة على الموقع وتغطس في الورق وفييين على ما تفتح الصفحة وتديها امر تاني... وبعد ساعة طويلة ضاعت من عمري سدى بصيتلي بكل الم وحزن وقالتلي النت النهاردة واقع غريبة اول مرة تحصل معايا
سبحان الله النهاردة تحديدا وعلى بختي المنيل ماشي والعمل
ايه رأيك تعدي عليا بعد يومين
يومين ماينفعش انا لازم اسلم الشغل بعد بكرة
لكن بكرة اجازة! وهنا نظرتلي بترقب وسألتني انت هتدخليهم في البيت
ايوه ياختي اعمل ايه
طيب خلاص مش مشكلة انا ممكن اديكي اليوزر بتاع الوزارة وانت تستخدميه لاضافة صلاحياتك والبيانات المطلوبة..
وفجأة لمعت في دماغي فكرة شريرة اصل انا نسيت اقولكم انه شغلي مالوش علاقة خالص بالكمبيوتر وماحدش هنا يعرف ان انا اجيد استخدامه جدا وهي فاكراني كي جي ون كمبيوتر وقعدت تشرحلي ازاي اكتب الارقام في مكان اليوزر وازاي استخدم الاوبشنز اللي يلزمني بس وانا طبعا بحاول بكل جدية اني اتابع واتعلم منها... بصراحة حسيت اني استندلت معاها وجالي احساس غريب بانه في حاجة غلط في الموضوع..
وطلعت مكتبي فزميلتي بتسألني عملت ايه في حكاية البيانات.. ودي كانت عارفة الموضوع من اوله.. روحت عامله غضبانة وقولتلها انا عارفة ايه الوزارة الفاشلة دي نت بيقطع وخدمة بايظة وانا كده هتأخر انا طالع للادارة يشوفولي حل!
طبعا ماكنش هينفع ابدا ان انا اقولها اني خدت اليوزر من الموظفة واني هاستخدمه في البيت وخدت بعضي وروحت وقعدت قدام الشاشة وانا متحمسة على غير العادة ودخلت موقع الوزارة وارتسمت على وجهي ابتسامة شريرة وانا باستخدم اليوزر ولقيته شغال فعلا.. اصلي لاخر لحظة كنت معتقدة انه الموظفة لا يمكن تديني معلومات بالسرية دي واليوزر هيطلع فشنك في الاخر.. بصراحة خفت من نفسي وابتدت بنات افكاري تتجمع في دماغي واحدة تشيلني وواحدة تحطني.. اللهم اخزيك يا شوشو هو انا بتاعة الكلام ده برضه لقيته قاعد على كتفي بيشاورلي على شوية زراير في الشاشة توووحفة ويقولي بصي بالزرار ده ممكن ترفدي اي موظف في الوزارة ومن هنا ممكن تدي لنفسك صلاحيات وااااسعة روحت انا مكملة معاه ومن هنا ممكن اديني علاوة وانقلني من الوزارة او ارقيني يخرب بيتك يا شوشو لا لا انا هادخل على اسمي بس وادخل المعلومات واخرج على طول وانا عندي غسيل وكنس وطبخ اصلا ومش فاضية للعب العيال ده لقيته بيبصلي بشك ويقولي في لكنة تعبر عن تهكم صريح
عليا انا الكلام ده يام تفيدة احنا عجزنا ولا ايه.. ايييه الله يرحم ايام الشقاوة
خلصت ونزلت جري ولقيتني بقول لنفسي اما الموظفة دي عبيطة بشكل دي حتى ماتعرفنيش ازاي تديني يوزر الوزارة بالسهولة دي اي نعم انا شكلي انسان محترم  وابن ناس احم بنت ناس لكن مش لدرجة الثقة العمياء دي.. ولقيت نفسي بترد عليا وتقولي يا عبيطة دي فرصة انك تعملي شغلك من غير ما تضطري ترجعي للموظفة كل شويه وهي مسكينة الله يكون في عونها مش كفاية الشغل والعيال حتكوني عليها انت والزمن..
وجهة نظر برضه لكن انا فاكرة تاريخي الاجرامي كويس كان حلم عمري اكبر وابقى هاكر محترف!
شغلت صاروخ الكنس وسرحت في ملكوت الله وطلعلي شوشو تاني متراقصا على انغام المكنسة الكهربا وحط قصاد عيني صورة الموقع وقالي يا سلام يام تفيدة اهو كده الشغل شوفتي الاوبشن اللي على جنب بتاع تغيير الباسوورد يعني ممكن تقفليلهم موقع الوزارة ويقابلوني بقى لو عتروا عليكي
شوشو اخفى من وجهي الساعادي ماهيه مش ناقصة الا انت كمان ده انا بقالي سنتين بحاول احفظ نمرة نوبايلي كل ماحد يسألني اديه الارقام كلها واقوله رتبها بمعرفتك بقى والنهاردة ابص للباسوورد المدعوق ده مرة واحدة مرة واحدة بس لزق قدام عيني ومش عارفة امحيه من دماغي ازاي...
انا احسن حاجة اروح للموظفة واعترف.. طيب اعترف بايه ما انا ماعملتش حاجة غلط.. لحد دلوقت على الاقل...
انا ابتديت اقلق من نفسي بصراحة ربنا واحسن حل قبل ما الاقي السي اي ايه طابين على البيت انا هاروح اسلم نفسي وتستاهل اه محدش قالها تلعب في دماغي!!  
انا بقولكم اهو من دلوقت محدش يجيبلي عيش وحلااااوة وحرمت خلاص مش هاسمعني تاني ابدا!

Friday, October 8, 2010

"كراكـــيب آخر زمـــن!!"

http://sexualityinart.files.wordpress.com/2007/06/scream.jpg



كنت ماشي على كوبري 6 اكتوبر مستعجل كالعادة الرطوبة عالية والزحمة خانقة لفت نظري وهو قاعد على الجسر بيبص لبعيد حزين عاوز يخلص من حياته سالته ليه عاوز تنط من هنا من غير ما يبصلي قالي خلاص الناس كرهتني وخنقتني بسلبيتها انا الطموح اللي الكل بيشلني في اول عمره كانت الشباب زمان تتفشخر بيا وشايليني على كتافهم وهاتك يا هتاف وشعارات ده انا كنت قاري فتحة على بت عمي كفاح والدنيا بومبي لحد ما المسكينة جالها شلل من تحت راسكم لا وكله كوم والعيل في ك ج ون ده كوم لوحده قال ايه يقولك ماعنديش طموح وعاوز انتحر يا ابني مش لما تعرف يعني ايه طموح تبقى تقول عاوز اخلص من حياتي  شوفتش وكسة اكبر من كده! انا خلاص ماعدتش عندي حاجة اديها لغيري وقرفت من الدنيا ملل ملل ونفس الاسطوانة المشروخة والحجج القديمة البالية قال ايه الحكومة قتلت الطموح عند الشباب هو انا مت يا عبيط مانا متلقح على الكوبري ومستني فرج ربنا اللي ماحد عبرني
 الجدع ياعيني صعب عليا وكنت عاوز اساعده بجد يعني لكن ماقدرتش اصلي اتأخرت ولازما الحق طابور العيش!
بصراحة حسيت اني اتخنقت ومحتاج اغير جو قولت اطلع الارياف ومشيت اتأمل في حال الدنيا شوفت الامل بيعلق مشنقته على شجرة عتيقة محتاس في طول الحبل
 والحماس شايل صرة هدومه على كتفه وطالع سكة القطر وقعد عليها حاطط ايده على خده مستني الطروماي اللي يودي سكة اللي يروح ومايرجعش
لحد ما نظرته من بعيد ببص عليا وبقول لنفسي ياترى الزول ده انا شفته فين شوفته فين مش غريب عليا لكن بقالي زمان ما شوفتوش هو انا شفتك فين قبل كده انا التفاؤل وايه اللي بهدلك بالشكل ده ياعيني عليك ياخويا هفتان وعدمان االعافية وكأني نزعت فتيل قنبلة انفلت في نوبة عياط ورمى راسه على كتفي اضطريت اطبطب على كتفه واطيب خاطره اعمل ايه مانا قلبي رهيف
وفي وسط المعمعة بصيت لقيت الحزن واخد جنب  قاعد حزين مدايق ومجمع حواليه الهم والغضب والاكتئاب قولت للحزن مالك حزين ومدايق كده ليه بصلي من فوق لتحت بقرف وقالي ده افترا دي مش عيشة 24 ساعة سبع ايام في الاسبوع ده ظلم انا نفسي تعتقوني بقى عاوز اشوف العيال يوم اجازة يا ناس سالت الهم رد عليا من غير ما يعبرني بنظرة وكان باين عليه التاثر رفع راسه وبص للسما وقال كشفت راسي ودعيت عليكم دعوة وليه ساعة عصرية يا ظلمة اهئ اهئ اهئ اما الغضب فكان متنفرز وشايط على الاخر وهو بيقول احنا لزوما نروح نعتصم قدام هيئة الامم يشوفولنا حل بالبشر دولن دي مش عيشة رد عليه توتر اللي كان باين قلبه ورمان علينا وقال هي مش قفلت خلاص وهيعملوا العمارة بتاعتها ملاهي
 وفجاة صرخ الخوف صرخة رعبتنا كلنا وبقى يتمتم بكلام كتير محدش فهم منه حاجة بصله القلق بغيظ وقاله هي ناقصاك انت كمان سيبت روكبي الله يخرب بيت سنينك قال من جاور السعيد يسعد وانا اتكتب عليا اجاور المقاطيع دول
وبكل طاقتي وما تبقى من نفساويتي المنصدمة حاولت احلل المشكلة واخفف عليهم لعل الازمة تمر على خير واحد بس وسط القعدة كان فارسني وغايظني ونفسي افرمه واعمله كفته اصله كان مكركر وقالب على ظهره من الضحك ومنشكح اخر انشكاح ايون هو الندل الجبان اس البلاوي دي كلاتها!!
عرفتوش هو مين؟