سالخير عليكِ يا أمي
مساء النور يا سماح احطلك تتغدي ولا بعد ماتريحي شوية
لا يا أمي اريح ايه ده انا طافحة الكوتة طول النهار وعلى لحم بطني
نظرتلي الست الوالدة شذرا وكأنها مش مصدقة... على لحم بطنك برضه يا سماح عليا انا الكلام ده
يا أمي انت بتسمي الكلام الفاضي اللي انا باكله في الشغل ده اكل
يابت حرام عليكِ نفسك ده انت خارجة النهاردة الصبح وفي ايدك باقي حلة المحشي اياها ده انا وابوك ماكلناش منها حاجة
ايهي حلة محشي.. دي يادوب الواحد يجرح زوره بيها واضطريت اشتري شندوتشين كبدة واحبس بكوبايتين شاي علشان اعرف اصلب طولي باقي النهار
ياخراشي اعمل فيكِ ايه بس الكلام معاكِ مامنوش فايدة انا اكلم ابوك يشوفله صرفة معاكِ
اه ماشي اللي تشوفيه يا حاجة مش هناك بقى
يا مراري... يابنتي شوفي نفسك في المراية... مراية ايه انتِ يلزمك درفتين مراية جنب بعض علشان تشوفي نفسك فيها
ايه الكلام اللي يسد النفس ده يا أمي
ياريت طيب تتسد نفسك وترحمي نفسك شوية
ام سامية هاتي من الاخر انت ماطبختيش النهاردة صح... ولا تزعل نفسك يا جميل حالا نطلب ديلفري تحبي تتغدي ايه نجيب فراخ ولا كباب وكفتة ولا...
يابنتي يابنتي انتِ مش حاسة بالمشكلة اللي عندك خالص...
يوه يا حاجة انا عارفة انتِ عايزة تقولي ايه وبصراحة السيرة دي بتغمني ماتسيبيني على راحتي يا أمي
انا سايباك على راحتك بقالي سنين وادي النتيجة ممكن اعرف اخر مرة طلعت فيها الميزان كانت امتى
ليه الاحراج ده بقى
لاني خلاص طهقت والكلام الحنين ماعدتش يجيب نتيجة معاكِ
يا أمي هو ايه بس اللي مدايقك
يابنتي بصي لنفسك عاجباك الكلاكيع والكلابيز المبقللة من كل حتة
انتِ بتجيبي المصطلحات دي منين يا حاجة
ماهو من عمايلك
ماتخافيش يا حاجة الصحة حديد
يووووه انتِ بتستعبطي يابت... من الاخركده ام وائل جايبالك عريس لقطة وخايفة يطير منك زي اللي قبله بسبب وزنك ده
ااااه قولي كده من الصبح الموشح اياه كان لازم اعرف من الاول... وطبعا كالعادة الناس حتيجي تعاين وعايزاني اخس كااام كيلو واخفي ما يمكن اخفاؤه من التضاريس البارزة علشان اعجب مش كده...
يابنتي انا نفسي اتطمن عليكِ اخواتك كلهم اتجوزوا وانا خايفة يفوتك القطر وتقعدي في قرابيزي
من الناحية دي اتطمني انا حجم عائلي يعني عمليا انتِ تقعدي في قرابيزي مش العكس... هو قرابيز يعني ايه
يعني اولع في نفسي يابت افهميني وريحي قلبي مرة واحدة بس بكرة اموت ومايفضلكيش حد وتلاقي نفسك لوحدك ومافيش حد حواليكِ
ايه الفيلم العربي ده يا حاجة على معدة فاضية
لا والله دي مش معدة اللي فاضية ده دماغ فاضي ومافيهش غير الاكل والشغل.. يابت شوفي البنات اللي في سنك بتعمل ايه ده انا في عمرك كان معايا اتنين والتالت على دراعي والجواز فرصة مابتجيش كل يوم خصوصا في سنك
وفي هذه اللحظة رن جرس الباب فتنفست الصعداء وانا كلي ثقة اني كده خلصت من بقية المحاضرة وجريت ناحية الباب واذ افاجع بام وائل...
------------------------------------------------
اهلا يا عروسة ازيك يا سماح الحمد لله اول مرة اشوفك والاقيكِ صاحية ومافيش في ايدك لا سندوتشات ولا كوز درة
برقت لام وائل وانا بدخلها ورسمت على وجهي ابتسامة ضحلة...
اهلا اهلا يام وائل جيتي في وقتك
طبعا قولت في عقل بالي الحق افلسع بقى قبل ما جوز النسوان دولن يتفقوا عليا... طيب ادخل اعملكم الشاي انا بقى
لا شاي ايه يابنتي انا مش غريبة ومش جاي اضايف تعالي اقعدي جنبي
بصيت لامي لقيت على وجهها ابتسامة النصر وشاورتلي على طرطوفة الكنبة جنب ام وائل بعنيها... وقعدت...
ها يا عروسة اخبارك ايه وازاي الشغل اليومين دول و...
وطبعا كل المقدمات والكلام الفاضي اللي لا يودي ولا يجيب... وعلشان اخلص من الليلة اللي مش باينلها اخر دي واقدر اتلم على حبايب قلبي حلل المطبخ عملت عبيط بصتلها وعلى وجهي ابتسامة هبلة وبهز راسي بالموافقة كل شوية... وطبعا عصافير بطني عاملة ماتش كورة جوا وشايفة قدامي دستة نجوم بتلمع ومش سامعة في وداني غير حاجة واحدة... "ظلموه"...
يابنتي دي سنة الحياة وامك عايزة مصلحتك طبعا فاهماني يا سماح
طبعا طبعا
يعني حتعملي زي ماقولتلك
طبعا طبعا
يا الف بركة طيب حيس كده قومي اعمليلنا الشاي يا سموحة
انا سمعت كلمة شاي وقومت جري على المطبخ وبوجهي على حلة الطبيخ واذ... بامية حبيب قلبي واحشني يا غالي... غرفت لنفسي تلة رز وصبيت فوقيها شلال بامية ونسفت الحلة عن اخرها... وافتكرت الشاي طبعا ما انا لازم احبس بعد الوليمة دي... شهلت على الشاي ودخلت على جوز الكناري اللي كانوا بيتوتوتوا واول ما دخلت نزل عليهم سهم الله...
اتفضلي الشاي يا خالة
تسلمي يا سموحة وعقبال شربات فرحك
خلاص يام وائل هانت وتجوزيها على ايديك ان شاء الله
طبعا ده انا وصفتي ماتنزلش الارض ابدا ولو مشيت على البرنامج ده حتجوزيها بعد تلات تشهر يام سامية
اي والله يام وائل دي احسن وصفة ريجيم شوفتها لحد دلوقت
فجأة حسيت بجردل ميه ساقع نزل على ام نافوخي... ريجيم ايه ياخوانا
الريجيم اللي قولتلك عليه من شوية يا سماح
شوية مين يام سحلول
حتى بالامارة وافقت وتحمست للفكرة
تحمصت ايه يا وليه انتوا بتخدوني على خوانة
الوليه رقعت ميت يمين اني سمعت الكلام ده كله ووافقت عليه والست امي العزيزة طبعا بصمتلها بالعشرة وادبست انا في الوقعة المنيلة دي قولت طيب على الاقل اتطمن على مستقبلي... طيب هو الريجيم ده في اكل ايه يام وائل
لا مايكونلكيش فكرة يا سموحة ده حيعجبك قوي.. بطاطس.. مسلوقة... بيض.. مسلوق... حبة فاكهة.. في اليوم... ستيك.. مسلوق...
هو ايه اصله ده الوليه طالع عليها عفريت اسمه مسلوق... وبعد ما مشيت لقيتني دخلت اوضتي وافتكرت البامية وصينية البطاطس وحلة المحشي ام ودنين والكباب والكفتة وبتخيل كل ده قدامي وفجأة بيختفي شوية شوية وانا اعيط واغنيلهم "يا مسافر وحدك... وفايتني..."...
ولاني من النوع الذي لا يستسلم بسهولة قولت في نفسي انا خسرت معركة لكن الحرب سجال ولازوما اجرب الجولة التانية... جيه الحاج ابو سامية وام العيال دخلت بيه على اوضة النوم وقفلت عليهم الباب.. رويترز بقى وموجز السادسة... المهم عملت شاي ووقفت على باب الاوضة وجيت اخبط واذ سمعت ام سامية بتقول...
------------------------------------------------
بقولك ايه يابو سامية بنتك دي خلاص غلبت معاها اتكلم معاها انت بقى عقلها ماهو مش ممكن كده
مالك بس يام سامية انتِ قصدك على مين
يعني مانتاش عارف مين يابو البنات ولا دي اكمنها اخر العنقود حبيبة قلبك طبعا ماهو ماحدش بوظ اخلاقها واداها عين غيرك
سماح عملت ايه بس دي نسمة
نسمة يا شيخ ضحكتني نسمة بالحجم ده
مايصحش يام سامية تتكلمي على بنتك بالشكل ده اومال سيبتي ايه للناس
الناس كلت وجهي يا مرتضى والبنت كل يوم بتتخن عن اللي قبله لحد ما بختها مال وشكلها هتفضل قاعده في قرابيزي.. اهئ اهئ اهئ
يام سامية ايه الكلام اللي انت بتقوليه ده البنت لسه صغيرة دي ماحصلتش تمانية وعشرين سنة
يالهوي انت عايز تفرسني يا راجل البنت قفلت تلاتين سنة الشهر اللي فات
ايه... ياه العمر جري بينا يام العيال
شوفلك حل معاها يا مرتضى البنت كده هتعنس وتفضل في وجهنا
حاضر انا حكلمها
انا سمعت الحوار ده غصب عني طبعا وبصراحة صعبت عليا نفسي.. كل ده شايلين في قلبهم وساكتين طبعا تلاقيهم عايزين يخلصوا مني ويعيشولهم يومين خاصة والسيد والدي داخل على مراهقة الخمسة وستين.. قطع المعاش وسنينه اهي المصلحة كانت ساترة الراجل وماليه وقته وتفكيره يصحى كل يوم ويخرج الصبح من البيت للشغل ومن الشغل للبيت ومن لما طلع معاش لبد في البلكونة ودي هواها بحري وقعدة تشرح طول النهار... ماعلينا خدت بعضي ورجعت بالشاي المطبخ وقعدت افكر واقلبها يمين في شمال واخيرا قررت اسمع كلامهم المرة دي ماهو انا مايخلصنيش ازعل الحاج والحاجة مني واذا كان ولا بد اخس تنتوفة مافيش مانع...
وتاني يوم عدت علينا ام وائل وانشكحت اخر انشكاح لما اديتني ورقة الريجيم اللي حمشي عليها وكأنها بتديني مفتاح مغارة علي بابا والاربعين حرامي...
همه يومين بالعدد ونفساويتي تعبت والهالات السودا بظت تحت عينيه من قلة الاكل والنوم... طبعا انام ازاي وعصافير بطني اتحولت فجأة لديناصورات وهات يا خبط طول النهار والليل...
وتالت يوم وانا مروحة من الشغل رجليه وديتني لمحل عم حسين قولت اعدي اسلم بس... خرجت من عنده وانا في ايدي عشر باكوهات شكولاتة من اللي قلبي بيحبها وطلعت العمارة وانا بدعي ربنا امي ماتشوفنيش وانا داخلة وتروح مفتشاني كالعادة واستحياطا خبيت الباكوهات بين هدومي... طلعت والحمد لله ام سامية في المطبخ... دخلت اوضتي وطلعت الغنيمة ومن كتر شوقي وحبي فتحت الباكوهات كلها مرة واحدة ومنين اكلك يا بطة... وفجأة دخلت ام سامية الاوضة وظبطتني متلبسا بالجرم المشهود... فارشة الارض والشكولاتة بايديا الاتنين ووجهي اختفت ملامحة تقريبا بفعل سوحان الغالية عليه... الست الوالدة خدتني من وداني على المغسلة وهات يا شتيمة في الشكولاتة واللي صنعها واللي بيبعها واللي بياكلها وانا اقولها ادعي عليا انا بلاش الشكليطة وهي تجيبني لفوق وتنزلني سابع ارض...
وطبعا انتهت الليلة ببياتي من غير عشا ومنعت عني الفاكهة يومين... وياريت اكتفت بكده لا دي سلطت عليا الحاج قال ايه لازوما اعمل رياضة كل يوم...
بصي بقى يا سماح المسافة الاول حتبقى مش اقل من تلاتة كيلو مشي نزودهم بشويش... ومافيش اسانسير من هنا ورايح فاهماني طبعا وبلاش تروحي الشغل بالاوتوبيس خديها مشي والمسافة مش كتير...
انا طبعا سمعت الكلام ده اغمن عليا من الخضة... وفضلت على الحال ده شهر بحاله كنت بحس ساعات اني حموت من الالم اللي في رجليه وظهري... وفي يوم وانا مروحة مشي طبعا شوفت منظر خلاني تنحت... محل حلويات فاتح جديد والاصناف اللي معروضة في الفترينة خووووورافة... وافتكرت حبي القديم....
------------------------------------------------
وبقيت ابص للشكولاتة المرصصة في الفترينة واغنيلها.. "وبحبك وحشتيني... وبحبك وانتِ نور عيني"... ولقيتني بناجيها واواسيها واقولها...
ياللي سمارك في لون طين بلادي... لكِ كل حبي وودادي...
اصبري يا ضي عنيا.. لحد ماخس شويه.. والعريس يطب وبعدها اطلع عينه زي ما طاع عنيا...
لكن طبعا انا عندي ارادة ولاينكن اكسر كلام الست الوالدة خصوصا وانها حلفت عليا يمين طلاق بالتلاتة ان ما كنت اتعدل وامشي عدل لاتكون حدفاني من الشباك...
وجاءت اللحظة الحاسمة... وقفت على الميزان وانا حاسة قلبي وصل البلعوم... بصيت في الرقم وبقيت مش مصدقة نفسي معقولة خمستاشر كيلو في شهرين ده كده رضا واخر حلاوة... وجاء اليوم الموعود... يوم الكشف والمعاينة...
ها حتلبسي ايه يا سموحة
ايه رأيك البس التايور الاصفر
لالا بلاش الاصفر ده بيعملك كلابيز... البسي الجيبه السكري مع البلوفر السماوي اهو بيغطي الحاجات دي ويخفيها...
كلابيز! اللي تشوفيه يا امي...
ودخلت بالعصير على العريس بعد توصيات مطولة من ام سامية... افردي وجهك يا سموحة... شدي ظهرك وانت قاعدة يا سموحة... ماتضحكيش بصوت عالي يا سماح...
الشهادة لله العريس كان شكله امور خالص ومسمسم بس الست والدته كانت عايزه تفترسني بنظراتها... وشوية ولاقيتها بتميل على ودان ابنها وقالتله حاجة راح هو باصصلها وهز راسه... وبعدها خدوا بعضهم ومشيوا...
بعد يومين روحت من الشغل لقيت امي كل عين عليها قد الطمطماية... فيه ايه يا حاجة...
لا مافيش اصل الجوازة باظت
وعرفت منين انها باظت
ام وائل لسه ماشيه من شويه قال ايه العريس كان بيدور على عروسة بيضه ومربربه وانت ماطلعتيش مقاسه
يالهوي بقى كل الحرمان ده واللي عملتوا فيا يا ظلمة وفي الآخر عاوزها مربربه... طبعا بقى عندي اصطدام في النفساوية واكتأبت... خدت اجازة من الشغل وطلعت تاني يوم على محل الحلويات اياه وغطست في الفترينه وحلفت ما اخرج منها الا وانا راجعة زي ما كنت...
هي ساعة زمن ولقيت نفسي في الانعاش بعد ما اتعملي غسيل معدة وطلعوني من العناية تاني يوم وبقيت تحت المراقبة...
كده يابنتي انت عايزة تموتيني ناقصة عمر
خلاص يا امي حقي برقابتي انا لا عايزة اخس ولا عايزة اتخن ولا عايزة اتنيل اتجوز وخليني في قرابيزك واوعدك عمري ما ازعلك...
هي سمعت الكلمتين وهاتك يا عياط
يا حاجة ما تعمليش في نفسك كده بنتك زي الفل ربنا يخليهالك... دي كانت جارتي في الاوضة ست كبيرة ووجهها سمح قوي...
ربنا يكرمك يا حاجة ويقومك بالسلامة...
تلات ايام في المستشفى ماليش ونيس غير الحاجة السكرة جارتي وامي... ويوم ماجيت اخرج لقيت امي والست ام محمد بيتهامسوا.. استغربت طبعا ودفعني فضولي لسؤال امي بعد ما خرجنا...
لا ابدا انا كنت بديها النمرة وعنوان البيت
ده انتوا اتصاحبتوا بقى... بصيت لامي لقيت على وجهها ابتسامة صافية وقولت في نفسي خير اللهم اجعله خير...
وبعد يومين شرفتنا ام محمد بالزيارة بعد خروجها من المستشفى ومعاها ابنها محمد وجوزها... ويادوبك دخلت اعمل الشاي سمعت صوت زغاريد.. خرجت اشوف فيه ايه ولسه داخله الصالون لقيت ابويا بيقولي..
مبروك يا عروسة احنا قرينا فاتحتك على الاستاذ محمد... قولتي ايه
قولت ايه في ايه... طبعا نزل عليا سهم الله وعملت مكسوفة وعنيا في الارض وبصوت يادوبك مسموع قولتله..
اللي تشوفه يا والدي... لولولووووليش
تمت
