من قيمة شهرين كده زارتني الست بدرية جارتنا عايزاني في خدمة. أصل جوزها الاستاذ لطفي طلعوه معاش وياولداه بقى مش ملاحق على طلبات البيت والعيال بعدما دخله اقل اكتر من النص ولا عاد في حوافز ولا اكراميات ومافيش على لسان الاولاد غير هات هات... والراجل الله يكون في عونه كبر على المرمطة ومش حمل بهدلة. والست بدرية كانت جايالي علشان اشوفله شغلانه عند حد من معارفي بمهنته في الحسابات يعني. وان جيتوا للحق انا اتكسفت من الولية وصعبان عليا الحاج الكباره بس اعمل ايه ما انا عارفه انه ماحدش هيقبل يشغله، دي العيال بتتخرج من الجامعة وبياخدوا دورات كمبيوتر ولغات وما اعرف ايه ويادوب يلاقوا شغلانه بمرتب تعبان يبتدوا بيه حياتهم. لكن ما حبيتش اكسفها وسألتها عن فلوس المكفأة اهم ينفعوا في حاجة واتفقت معاها تجيني هي والاستاذ لطفي... وبعد التفكير والدعبسة في احوال السوق استقر رأينا على ان احنا نفتح محل صغير للمنتجات الصينية يعني كل حاجة وكافة شئ من اول الادوات المكتبية وحاجات العيال للمدرسة ولغاية الحلل ومستلزمات المطبخ. والمحلات دي بقيت منتشرة جدا وبتكسب كويس واهو الاستاذ لطفي يمسك حسابات المحل ونجيب شاب صغير عفريت وداعك السوق للبيع وانا ادخل شريك بجزء من رأس المال.
وكانت الحدوتة ماشية تمام وآخر حلاوة لحد ما الاستاذ لطفي ماخلص دراسة الجدوى وقرر انه ناقص علينا للمشروع خمس الاف جنيه... لفيت كعب داير على كل اللي اعرفه وممكن استلف منه او يدخل شريك معانا بس هيهات... ورحت للاستاذ لطفي وانا كلي كسوف ووجهي منه في الارض، لاقيته بيستقبلني بابتسامة عريضة وبيقولي انها فرجت وانه الشريك موجود... ويا وكستي وميلة بختي لما عرفت انه الشريك الخفي ماهو الا مقصوفة الرقبة البنت عطيات ودي مجايب الست بدرية... وقلنا معلش علشان خاطر المشروع يشوف النور... خلصنا ورق الحكومة وأجرنا محل صغير وجبنا البضاعة وعملنا دعاية على الضيق في الناحية والمحل ابتدى يشتغل...
وبعد مدة ابتدت عطيات تزن على دماغ الاستاذ لطفي علشان نفتح زاوية حريمي في المحل عطور ومكياج والحاجات دي. في الاول انا رفضت لانه ماحدش فينا احنا التلاتة بيفهم في شرا وبيع الحاجات دي. بس السهنه بلفت دماغ الراجل وعملوا عليا رباطية ورقعوني قدام الامر الواقع.. وفقت على مضض واشترطت اني انا اللي اجيب البضاعة الحريمي.. ومش قادرة افتكر انا جبت الشرط المنيل ده منين وليه وايش فهمني انا في المكياج والنيلة دي... وعلشان ماعكش رحت للست جمالات جارتي وحبيبتي وانا فاكرة انه كان ليها اخت بتبيع الحاجات الحريمي عندها في البيت والست الله يكرمها دلتني على تاجر جملة خواجا ورحتله..............................
دخلت المحل وعملت هانم. كان في واحد ابيض مكلبظ مقرفص قدام رف بيرص علب بودرة. قلت لنفسي هو ده ادخلي جامد بقى...
يا استاذ يا خواجا صباح الخير..
اخلا اخلا ياخانم مخسوبك ايمانويل اي خدمة؟
انا عايزة مكياجات حريمي
ماشي عندنا كل حاجة يلزمك ايه؟
يعني برفانات كريمات.. بودرة (قلت اعمل بنت سوق وفاهمه) وخلي بالك انا تخصص بودرة واشم ريحة الصنف الكويس من بعد كيلو فماتحولش تديني بضاعة مضروبة من اياها ماشي...
بودرة! آه وعايزة مخلي ولا مستورد؟
عايزة نخب أول. حاجة ممتازة تجر رجل الزبون يدمن عليها وترجعه عندنا تاني وتبقى الحريم لاسعة عليها.. وبص انا افهم في الصنف كويس ومش هشيل الا لما اعاين الاول
ااششش وطي صوتك... انا فخمت خلاص.. بس...
(قلت خلاص هو ده ودلوقت اخش تقيل علشان ابين ناصحة وما اتغلبش في السعر...)
انا بعتني ليك المعلم سحلب
المعلم سخلب؟!!
بص بقى يا خواجا انا دعبست واتطقست قالولي انه الصنف اللي انا عايزاه مش هلاقيه الا عندك.. وانا جايه افيد واستفيد
اسمي ايمانويل مابخبش خواجا.. قلت المعلم سخلب هو اللي بعتك؟
ايوه هي سيرة.. ووصاني اقولك شيلني واتوصى ياعم نويل.. انا هاخد بودرة المرة دي هي اللي ماشية اليومين دول
ايمانويل ياخانم. وعايزة تشيلي كام؟
انا هاخد خمسين الاول اجربها في السوق ولو الصنف طلع تمام هاخد كمية اكبر المرة الجاية
عشرين الاول لاخسن ماتقدريش عليها
لا ياعم نووليل احنا نتفق على السعر من دلوقت
ايمانويل ياست.. هديك زي ما اديت للمعلم سخلب ماينقصوش سختوت
(هو المعلم سحلب مين واتفق على كام؟ وانا لازم اعك واقول اسم سي حلبة ده... ماعلينا) ماشي وانا شاري رصهم لي بقى ومش عايزة علب مضروبة يا بابا نويل ارجعها والله
ايمانويل ايمانويل.. العلب بتاختك هخطها من الصنف المخصوص لخبايب المعلم سخلب.. الزباين الخلوة تاخد من المخزن ثانية واخدة..
ماشي بس بقولك ايه زي ما اتفقنا مش هدفع من غير ما اعاين..
اهو دول عشرين عايني براختك خالص...
ولسه بفتح بعلبة البودرة وواخد منها شويه على طرتوفة صباعي وفجأة سمعت صوت ضرب نار في الهوا وحركة عنيفة في المحل وواحد بيصرخ: ولا حركة كل واحد يثبت مكانه.. اقبض عليهم ياعسكري..
عسكري!! انا عملت ايه.. هي البضاعة دي تهريب ولا ايه؟
بتستهبلي ياهانم. بتهزري يعني مش عارفة في ايه
والنعمة ما اعرف في ايه بتقبضوا عليا ليه ماعملتش حاجة.. ده انا غلبانه يابيه
اخرسي وبلاش استعباط احنا ماسكينك متلبسه باتجار بالمخدرات
مخدات.. يامصيبتي.. الله يخرب بيتك ياعطيات.. ده راجل نصاب يابيه.. بتحاول تبعني مخدرات يامفتري..
انت خبيبي اللي طلبتها انت اللي جايلي مش انا اللي رايخلك
الله يخرب بيتك ياعين ياليل زي ماخربت بيتي. انت هتلبسني تهمة؟
ايمانويل ياوليه ايمانويل. خضرة الضابط انا هاعترف دي تبع المعلم سخلب..
ماتصدقهوش ياباشا هو انا وجه سحلب برضه..
بس منك ليها. حرز البضاعة ياعسكري. وانتوا حسابكم بعدين في القسم
يابيه ياباشا ربنا يعلي مراتبك وتبقى لوا انا مظلومة ده انا قد خالتك..
ابقي قولي كده قدام النيابة. على البوكس ياعسكري
دي اخرة اللي يشتغل في اللي مالوش فيه... ركبت البوكس ونمت على البورش وعطيات جاية تشمت وجايبالي عيش وحلاوة.. وبقيت سوابق.. عاجبكم كده!!!
واااه عجبي...
