من كام يوم كده كلمتني ريهام بنت اخويه في التلفون عايزاني في موضوع مهم وقال ايه ماينفعش بالتلفون.. قلتلها عدي علي بعد الشغل قالت لا تعالي انت. قلت ماشي امري لله ورحتلها بعد العصر...
البنت جابت الشاي وقعدت قدامي ساعة تمصمص شفايفها وتفرك صوابعها وهي ساكته وبتبصلي بطرف عينها.. باصتلها جامد واتنحنحت.. بصتلي وقالت: ايه يا عمتي عايزه ميه؟
لا مش عايزه ميه عايزة اعرف انت جايباني تتأملي في جمالي. ماتنطقي فيه ايه.
مافيش كل خير... عمتي انا.. كنت بقول يعني...
هااااه ماتوجعيش قلبي قولي
انا جاني عريس
ياسسسلام ومالك بتوشوشي عادي يعني دي بتحصل في احسن العائلات
عمتي بجد بقى
آه ماشي.. خريج ايه وبيشتغل ايه وعنده شقة ولا لأ و.. استني هو زميلك؟
ايوه. وهو راجل محترم جدا
خلاص على بركة الله خليه يجي اشوفه
بجد والله.. بس.. اصل بصراحة هو اكبر مني شوية قد عشر سنين بس
بس وبتقوليها في وجهي
يا عمتي انا مش صغيرة. ده انا بقى عندي خمسة وتلاتين سنة تفتكري فضلي كام فرصة علشان اقعد اتعزز...
يابنتي هو علشان انت كبيرة شوية يبقى تقبلي اي حد حتى لو مانعرفهوش واكبر منك!
يا عمتي انا مش عايزة اغلط غلطتك افضل اتعزز لحد ما الاقي نفسي في الستين واهل الحتة لسه بيقولولي يا آنسة
كده برضه.. الله يسامحك
والنبي ماتزعلي مني ياتفتف والله مش قصدي غصب عني... طيب ايه رأيك تروحيله الشغل وتسألي عنه ودعبسي على اصله وفصله زي ما انت عايزه..
ماشي خدي منه معاد وانا هاقعد معاه.. لما اشوف اخرتها
.............................
صباح الخير. حضرتك الاستاذ حلمي؟
ايوه يافندم. اكيد حضرتك عمة ريهام.. اهلا وسهلا شرفت يا هانم تشربي ايه
لا لا ولا حاجة انا مش هعطلك كتير
لا ازاي ودي تيجي ده انت اول مرة تشرفينا... عم بيومي من فضلك اتنين قهوة... تحت امرك ياهانم
انا سألت عليك زمايلك وبصراحة كلهم بيشكروا فيك وسمعتك زي الفل
طيب الحمد لله
وباين عليك انسان ناجح في شغلك ومركز و... حضرتك مش شايف انك كبير على ريهام شويه؟
آه علشان عديت الاربعين يعني ماهيه في ناس كتير بتتجوز بعد السن ده
ايوه لكن انت ماتأخذنيش ايه اللي قعدك من غير جواز لحد دلوقت..
شوفي حضرتك انا دلوقت عندي خمسة واربعين سنة وماتجوزتش زي كتير شباب غيري زحمة الحياة وغلاء المعيشة وازمة الاسكان وكتير من العادات القديمة اللي ادت لتأخير سن الجواز للجنسين... وانا مقتنع باني لايمكن افتح بيت واتحمل مسؤولية اسرة من غير ما اكون قادر على توفير ابسط مظاهر الحياة الكريمة للاسرة دي.
ده كلام حفظناه يا ابني من كتر ما بنسمعه في التلفزيون والراديو. ثم اي حياة كريمة اللي انت عايز توفرها هو انت هتلحق!
بتقولي حاجة حضرتك؟
آه.. ايوه وعلى كده عايز طبعا تخلف اقصد تجيب اولاد يعني
طبعا طبعا هو انا بتجوز ليه ولا مؤاخذة
آه وتسميه سعد اليتيم
ليه كده بس يا خالتي
ماينفعش خالتك وانت قد ابويه
ايه انت شايفاني على عكاز
بالراحة ياخويا ماتتزرزرش قوي كده ليحصلك حاجة وساعتها مش هاخلص من بنت اخويه... اقعد كده وهدي نفسك... واحد ليمون ياعم بيومي... انا اقصد انك يعني مش هاتلحق تخلف تكون طلعت معاش وعقبال الولد مايبقى ثانوية عامة تكون عديت الستين ويدينا ويديك طولت العمر...
طيب انا ذنبي ايه اديني حل تاني.. يعني افضل عازب علشان حضرتك تستريحي... ثم مش كل حاجة تقاس بالسنين على الاقل هابقى وفرتله الحياة الكريمة اللي تخليه مش محتاج حد واربيه واعلمه ازاي يعتمد على نفسه من البداية
هي وجهة نظر فعلا وهو الواحد مايعرفش هايعيش كام سنة
بالظبط.. اعمل لآخرتك كأنك تموت غدا واعمل لدنياك كأنك تعيش ابدا
ماشي بس.. بصراحة في سؤال محشور في حنكي من الصبح.. هو يعني بقى وبصراحة كده من راجل لراجل.. وانا زي خالتك يعني.. هو انت عازب فعلا لم يسبق لك الزواج، ولا بعد ما نديلك البنت نكتشف انك كنت متجوز عرفي ومخلف...
حد الله ما بيني وبين الحرام.. انا جايز عرفت بنات قبل كده بس ماوصلتش للحرام. ياست ام تفيدة الامر مايخلاش يعني زي اي شاب من اول بنت الجيران وعبد الحليم مرورا بزميلة الجامعة والنت لآخر زميلة الشغل والبحث عن الاستقرار..
ايوه ايوه.. نت انت بتعرف بنات في المدعوق ده؟!!
ايوه.. لالا انا اقصد.. مش زي مابتتخيلي هو بس ساعات كده بيبقى كلام عادي يعني مابيوصلش لاي نتيجة
ياخبتي انت فاكر اننا ماعرفش البلاوي السودة اللي انتوا بتعملوها وبتحصل على النت. ده بقى في جواز وطلاق وبلاوي زرقة وسودة.. انت مابتقراش جرايد.
ايه يا خالتي انت فاكراني من الشباب الهايف بتاع اليومين دول. انا عارف ازاي استخدم الوسيلة دي وعارف حدودي. انا لا يمكن اصدق انه العلاقات المشبوهة ممكن تنتهي نهاية سعيدة.. تصوري حضرتك من كام شهر واحد صاحبنا اتعرف على بنت كندية على النت وهات ياغرام وحواديت قلبت ليله نهار ونهاره ليل وتعلق بيها جدا بعد فترة اهله ضغطوا عليه علشان يتجوز اصله حيلة امه فأقنع البنت بتاعته انهم يتجوزوا عن طريق النت ويوم ماراح يجيبها من المطار اكتشف انها راجل والمصيبة انه عقد الجواز قانوني والقانون في كندا مابيمنعش زواج الجنس الواحد واهي القضية مرمية في المحاكم بقالها شهور...
ياسنة سوخة هو احنا وصلنا لهنا... ايه القرف ده... لا يا ابني الجواز ستره برضه
يعني موافقة يا خالتي مش كده... طيب نتفق على المهر والشبكة والفرح والذي منه...
لا يا ابني دي شكليات بتخلص في نص ساعة واذا كان على الشقة والجهاز انتوا اللي هتقعوده فيها مش احنا. اقعد مع ريهام واتفقوا براحتكم ده شئ يخصكم
طيب وابوها يا خالتي؟
ابوها ده راجل طيب بقاله سنين متغرب علشان يأمن ليها ولاخوتها حياة كريمة. ماتخافش مش هيمانع عنده غيرها اربعة
ربنا يخليك لينا يا احلى خالة ام تفيدة... طيب مافيش زغروته حلوة على نية القبول؟
ياريت اعرف استنى... عم بيومي تعرف تزغرت!
لولولولووووووليش
