"الكتكوت ده طلع عيني"

من يومين كده كنت في المستشفى بازور ست جارتنا قامت بالسلامة وخلفت ولد زي القمر ربنا يخيلهولها. أصلها هي وجوزها طفحوا الكوته عقبال ماشافوه بعد عشر سنين جواز وثلاث عمليات زراعة فاشلة... وللأسف زي حالتهم في المستشفى كتير.. حاجة توجع القلب...

انا قلت المستشفى قريبة يبقى أمشي للبيت.. لما دخلت الحتة كانت زي العادة، دوشة وحركة وكل حي بيشوف أكل عيشه قلت في نفسي اميل على جارتنا جمالات أشرب معاها القهوة...

شوية كده وحسيت حاجة بتشد الجلابية.. بصيت ورايه مافيش حاجة.. سمعت حاجة بتقول:

بثت بثت

بصيت تاني جهة الشد.. عيل صغير قد الفتفوتة ماسك طرف جلابيتي وبيشدها وبيبصلي بعنين واسعة وابتسامة عريضه وبيقولي: يا ثت هانم يا ثت هانم تثتري مني حاجة؟

أشتري؟ انت بتبيع ايه ياابني..

أي حاجة كافة ثيئ. عندنا كبريت لبان بودرة للوثش كريم حلاقة ثرابات حريمي كافة ثيئ فنينات اثاربات اللي انت عايذاه...

ايه يا ابني ده دي شنطه ولا كهف علي بابا والاربعين حرامي

لالا انا مث علي انا ثناكل

ثناكل بتاعة ايه يعني..

ثناكل يعني اثنكلك تثنكليني نثنكل بعض.. اثم الثهرة

آآآآآه. ماشي معلش ياشناكل مش محتاجة حاجة النهاردة بس أوعدك أشتري منك مرة تانية

ايه ياثت انت بتذحلقيني... طيب

لا لا انت هتعيط ماتعيطش بس ده انا غلبانه ومش مستحمله. طيب استنى قلي هو انت مش في المدرسة ليه؟

مدرثة ايه يابا هي دي تأكل عيث برضه ماالعيال اللي بتدرث وتنكت نفسها في الفثل طول النهار بتطلع من المدرثة في الآخر وتثرح في الثارع برضه

قمت انت يافالح قلت لنفسك اطلع بدري بدري وبلاش تضييع الوقت

ايوه كده

طيب ماانت تقدر تبيع بعد المدرسة

لالا ده الرذق يحب الخفية والناث كلها بتطلع دواماتها واثغالها الثبح وخاثة النثوان

طيب ماشي تقدر تدرس بعد الظهر

لا برضه ده معاد مرواح الطلبة والموظفين

يعني بلاش مدرسة!!

بالظبط ياعيني عليك ياام ثحلول واهو الواحد لاذم يلحق يكوم نفثه

ام سحلول ويكوم نفسه.. ياخبتك في كتاكيتك يامصر. دي العيال اللي لسه مافقستش بتفكر كده اومال الشباب تعمل في نفسها ايه!

دي عيال خايبة مث عارفه عايذة ايه. تعرفي اننا بكتب وبقرا وافهم انجليذي كمان اثلي باثرح ورا الخواجات احيانا لما الحال يدقر ثويه..

يا سنه سوخه وامك فين ياد مش خايفة عليك ده انت ماحصلتش تمن تسع سنيني على بعض..

ماتغلبينيث ياام ثحلول انا ثقر..

ايه ايه صقر ليه.. ده انت ماحصلتش كتكوت في بيضة يانص شبر انت.

انا مث نث ثبر انا اسمي ثقر وامي ماتت وهي بتخلفني

ياعيني ياابني الله يرحمها

ماثي ماثي ماحدث قلها تولدني

ياواد ماتتكسف شويه دي امك برضه. طيب ومين بياخد باله منك

الوليه مرات ابويه. بث مطلعه حبة عيني وقارفاني في عيثتي. بث انا هاوريها لما اكبر ثوية هطين عيثيتها هي وابويا اللي مث قادر عليها ده

ياواد بقى هي اللي مطلعه عينك ده انت تطلع عين بلد بحالها

ماثي والله ماكدبك بث اثتري مني اي حاجة عندنا كافة ثيئ

انت هتنده تاني انا اصطبحت في وجه مين النهارده.. الله يخرب بيتك ياعطيات

عطيات مين تقربلك جيبيها معاك تثتري مني حاجة

وجعت قلبي ياابني تاخد ايه وتسيبني في حالي..

اديني بريذه وانا اخفى من وثك.

بس كده كنت قلت من بدري. اهو.......... ايه ده ايه ده.. ياابن الهبله رميت البريزة ليه

ياثت ياثت انت مث عايثه في البلد بريذه يعني عثرة جنيه

ليه هو افترى. مش هديلك غير خمسه تاخدهم وتعتقني

ماثي ماثي امري لله.. عالم نتنه

بتقول حاجة

لالا بقول ابقي عدي عليه بكرة

انا هاركب تاكسي المره الجايه ارحم. نشف ريقي الواد ده لما اروح لبتاع القصب ابل ريقي بكوبايه...

وانا واقفة عند بتاع القصب وبراقب بالواد صقر اللي لسه سارح بكهف علي بابا واذ بست حجم المصارع الياباني قربت من العيل وزعقتله: قب بالفلوس ياد

فلوث ايه ياوليه احنا لثه منثترذق

الفلوس اللي قلبتها من الوليه اللي كانت معاك من شويه انا شايفاها بعيني بتديك فلوس.. انطق لاحسن افرمك

مااخدث حاجة ثيبيني يا وحثة....

وراحت ماسكه العيل من كعب رجله ورافعاه بالهوا ونزلت خض وجيوب الواد تمطر فلوس اشي شلنات واشي برايز وكله حديد.. ومانزلتهوش غير لما عكمها جوز جنيهات في ايدها.. واول ما نزلته راح جري ووقف بعيد عنها وطلع من فردة الجزمة اللي لابسها الحتة بعشرة جنيه اللي انا اديتهاله وراح مشاور لها بيها وزعقلاها: طيب والله ما انا معثيكي انت وجوذك الليلة وخليني اثوف مين حيثتريلك تطفحي يا ثريرة!!!