من كام يوم كده كنت ببح فم الغسيل لما سمعت جرس الباب فتحت لقيت الواد المفعوص مؤيد ابو نص لسان...
خالتي خالتي امي بتقولك انزليلها اسربي معاها القهوة عايزاكي في موضوع
ماشي يالمض اعصر فم الغسيل وانشره وانزلها
ماسي بس امي بتقولك ماتعوقيس ياوليه
انا وليه طيب صبرك عليا ان ماقرمتلك مناخيرك...
وانزلت وراه ودخلت على ام حفيظة وكانت عينيها متفحة من العياط وكل عين عامله زي الطماطمايه قلتلها مالك ياوليه كفى الله الشر.. هرتني بوس الاول وقالتلي اقعدي يام تفيدة ياختي وشوفي بلوتي وميلة بختي
فيه ايه ياوليه سيبتي ركبي
آه يانه ياختي.. حاقولك وانا ليا مين غيرك بس اجيب قهوتك الاول
قهوة ايه بس وانا جاي اضايف
لا لامنكن اعملك القهوة الاول
يام حفيظة مش عايزه قهوة خلصي انا سايبة الغسيل على البلكونه
طيب وماله ياختي واهو ينشف براحته تحت السمس
ياوليه هو الغسيل هينشر روحه على الحبل.. خلصي ماتوجعيش قلبي قولي
ماشي بس ماتتزرزريش كده طيب... علقتي الطبيخ على النار يام تفيدة
لا ياستي مالحقتش واهو كلها شوية بامية قرديحي اطبخهم لما اطلع
ام تفيدة هو انت بتاكلي كام طقة في اليوم انا شايفاكي مخسعة حبتين
ياوليه ياوليه انت جايباني تتكلمي في مشكلتك ولا في صحتي اهمدي واقعدي بقى
انت ياوليه ماتزعقيس لامي ايه ماوراهاس رداله
تعالا ياله تعالا فضحتني مع الوليه
الحقني يابا امي بتجري ورايه بالسبسب
ياوليه هاطلع من هدومي وانكش شعري وانزل ازعق في الحتة... انا ماشيه
لا يام تفيدة لا منكن ولا يكون معلش عيل امسحيها بدقني المره دي
انا هامسح ايه ولا ايه هي دقنك تساع
خلاص طيب اقعدي اقولك
قولي
المزغوده اللي تنشك في قلبها حفيظة كسرت نفسي ومابتسمعش كلامي وبتعمل حاجات حرام وانا خلاص فاض بيا
عملت ايه مقصوفة الرقبة
قال ايه ياختي بتقلد بتوع السيما والناس المجانين اللي بيطلعوا في التلفزيون.. شويه تقولي رايحه اذاكر عند صحبتي ترجع البيت وودانها كل شحمة فيها ستميت حلق وشويه تلون شعرها ضفاير ضفاير اشي احمر واشي اصفر واشي ازرق لا واللي زاد وغطى لبسها النص كم وكله كوم واللي جنيني منها التنتوه اللي في سنانها
تنتوه يالهوي.. هو تنتوه يعني ايه
دي ياختي تقليعة جديدة لشباب اليومين دول قال ايه بيرسموا جماجم وورد اسود وقطة من غير ديل على سنانهم
ايه ايه.. ليه هو مافضلش لحم يرسموا عليه علشان يرسموا على سنانهم
شفتي النيله اللي انا فيها دي مابقيتش ثانوي وبتعمل كده ومابتسمعش مني كلمه وانا خايفة على مستقبل البنت يضيع
طيب وماقلتيش لابو حفيظة ليه
ما انت عارفه طبعه مايحبش اكلمه في العيال ومشاكلهم ده بينزل اجازة كل فين وفين ولو اشتكيتله يتعصب ويضربني انا والعيال واخر مره قالي والله ياوليه لو مالمتيش الدور لاكون متجوز عليكي اسكندرانية تعرف قيمتي.. يرضيك كده
ماهو معاه حق الراجل يطفش ويدور على غيرك هو هج من شويه.. ميت مره افهمك اصبري عليه وانت ابدا يغيب عنك شهر بحاله واول مايشوفك تستقبليه بزعابيب امشير من على السلم... ماعلينا انا اقولك تعملي ايه مع حفيظة انت تجيلها باللين وتخديها بالسياسة
ايه يام تفيده ده يعني اعمل ايه
يعني تحاولي تفهميها تمتصيها وتستوعبي مشاكلها واهتماماتها تراقبيها من غير ماتشعر بكده تقعدي معاها وتتسايري معاها في حاجة تحبها اخرجي معاها فسحيها اهتمي بيها وان كبر ابنك خاويه وهي في سن محتاجة فيه قدوة
حدوة! يعني اسيب المطبخ وشغل البيت واتستت جنبها المزغوده دي
ياوليه سايريها اهتمي ببنتك شويه اعملي الحاجات اللي هي بتحبها سيبيها تتكلم وانت اسمعيلها واشغليها الفراغ والملل هو سبب نص مصايب الجيل ده
اه فهمتك خلاص من هنا ورايح هاهريها في شغل البيت واطلعلها شغل من تحت ظوافرها وبكده مش حيبقى عندها فراغ خالص اهدها وتنام زي التور
مافيش فايدة دماغك الطخينة هي اللي جايبانا ورا... بقولك ايه ماتكلميهاش دلوقتي انا هاقعد معاها لما اشوفها الخميس
وانت تشوفيها الخميس ليه ياختي
ياوليه حرام عليكي ماانا بذاكرلها العربي من تلات شهور كل خميس
آه صحيح وانا اقول البنت كل خميس تغطس وماعرفش بتروح فين
يانصيبتي روحي يام حفيظة هاتي ربع جنيه
ليه ياختي انت هاتسمسري مني يام تفيدة
وديني لكون مصوته ولامه علي الحتة
خلاص خلاص خدي
هاهأ لسه في حد يخبي الفلوس هنا ياوليه جتك نصيبة
ايه وفيها ايه اشيلهم في الطرحة علشان يبقوا قريبين من دماغي ضمانه يعني
ماشي.. واله ياض يامؤيد..... مؤيد ياحبيبي تعالا ياميدو تعالا اديك
تتديني ايه فيه ايه
يعني مش عارف يالمض خد الربع جنيه ده انا لا جيت عندكم ولا انت هاتجيب سيرة لاختك عن حاجة
ايه ياخالتي ده لا انا عايز جنيه
جنيه هاتي جنيه يام حفيظة
لا ماتبصيليش ياختي اعصريني وانشريني ودخليني فم الغسيل تاني ما هتطلعي مني سحتوت
كده ماشي امري لله خد ياواله مش خسارة فيك ومش هاتجيب سيرة لابوك
هاهأهأ بقى في حد بيشيل فلوسه في الحتة دي
فين ماتقوليش قدام العيل خد ياميدو
لا انت بتضحكي عليا السراب فيه تلاتة جنيه.. واحد ليا علسان اسكت والتاني ليا جدعنه منك والتالت هاسيبهولك جدعنه مني ماسي
ماشي يالمض ابنك قلب الشراب يام حفيظة
ياختي سيبيه يسترزق.. بقولك ايه يام تفيدة ماتاخدي العيلين عندك شهرين زمن
ايه ليه اعمل بيهم ايه
تراعيهم عقبال مارجع
ليه وانت رايحة فين
مافيش هاروح ازور امي في السيدة اطمن عليها وافك عندها كام يوم وراجعة على طول
يانصيبتي وبتسأليني العيال خايبين ليه........ غطيني وصوتي!
