شوفتوا اللي حصلي من البنت عطيات مقصوفة الرقبة، نهايتها هتبقى على ايدي ان شاالله بس قولوا يا باسط. من حوالي شهرين كده كنت قاعدة في اجتماع عام نسوان الحارة القبلي بتاع كل شهر، بنغلس على البنت بتعة وبنحش على الواد فهيم ابن عم مصطفى وخيبته في جوازته من البنت سوسو وبنقطع بفروة مدام اعتماد صاحبة البوتيك اللي في اول حارة القبلي.. ولما يفضل وقت بنشوف آخر اخبار الجمعية وجايز نعرج على اخبار الفنانين اللي بيطلقوا كل شوية او اخبار الساسة العرب اللي محافظين على سياسة حوار الطرشان يجيلهم كام سنة دلوقت...
وكنت مستمتعة جدا بالقعده اصلها حدث اجتماعي هام ما بتتكررش الا مرة كل شهر، وعلى ابو غفلة جات البنت اللي فرساني عطيات وقعدت جنبي قال ايه عايزة تصالحني وبادرتني بالكلام وقالت: ازاييك ياام تفيدة وحشاني ياحبيبتي. بصيتلها باستنكار ورديت عليها: ماتشوفيش وحش ياروحي. لاقيتها بتقرب من وداني ووطت صوتها وقالت زي ماتكون هترمي قنبلة فوجهي: انا جايبالك عريس قلتي ايه. قلت ايه في ايه هو انت قلتي حاجة. اي نعم انا كنت بشاور نفسي في الموضوع من زمان لو اتعرض عليه بس فين التفاصيل؟ مصمصت شفايفها وبصت يمين وشمال وغمزتني وقالت: دي فرصة اسمعي مني ومابتتكررش كل يوم والراجل واقع لشوشته ودفيان وعايز اللي تدلعه اخر ايامه...
آخر ايامه، يانهار ابوك مشلفط جايبالي واحد من الترب.
لا لا ياحبيبتي ده مش كبير خالص بس اصله مستعجل ومريش.
ايه حكاية مريش مريش دي يعني ايه هتجوز دكر بط ولا ايه.
ياحبيبتي ده دفيان وكسيب وعنده تلات فدادين طين في الوجه القبلي تساوي الشئ الفلاني.
وانت هتستفيدي ايه من العملية دي.
طيب حيس كده بقى خلينا واضحين وشفافين. اولا هخلص منك لانه ساكن في السيدة. ثانيا وعدني بحلاوة كويسه لو انا خلصت الموضوع. ثالثا انا هعزم كل نسوان بحري وقبلي على فرحك..
ليه هتلمي النقطة..
لا وانت الصادقة هعملهم الكوافير وهاكسب دهب وطبعا انتي اولهم ياعروسه.
عروسة! خليني افكر...
وروحت البيت وجري على المراية وكانت ابتسامتي من ودني اليمين لودني الشمال لدرجة اننا اتفزعت... اصل آخر مرة وقفت قدام المراية ماكانش وجهي متشلفط قوي كده... ياسنة سوخة البنت عطيات قالت انه العريس كبير شوية معقولة يكون وجه مشلفط برضه.. يعني ايه نتجوز ونخلف شلافيط صغيرة.. لالا هي عطيات قالت انه مش كبير قوي وشافني قبل كده يعني عارف الشلافيط اللي عندي. بس اتجوز ودي تيجي بعد العشرين ونص سنة اللي عندي...
انا افكر كويس قبل ماوافق وهحط شروط كمان... طيب، بس البنات الصغيرة كتير هو باصصلي ليه، يكون طمعان في معاش بابي الله يرحمه، لالا عطيات قالت عنده ريش. انا احسن اشوفه الاول..............
بنت يا تفتف قومي هاتيلي كباية ميه.. بنت يا تفتف قومي هاتيلنا شوية لب نقزقزه... ياوليه انا مش قلتلك ماتناميش قبل ماارجع... جيبي ميه انقع رجليه.... هاتي البتاع الريموتوت اللي شايلاه طول القعدة انا عايز اشوف الجزيرة... مش قلت مافيش خروج... اجيبلك منين اصرف عليكي ده انت نهبتيني ده انا لو البنك المركزي كان زماني فلست... يا ام تفيدة... يا تفتف....
................
بسم الله الرحمن الرحيم.. خير اللهم اجعله خير ده بايني نمت ولا ايه، ايه ده هو انا هتجوز علشان حد يقولي تفتف طول النهار، ايه القرف ده... ومافيش خروج ولا توم وجيري وطول النهار على الجزيرة ده انا ماليش في السياسة. لا، وحد يشاركني في اللب بتاعي ومايخليليش ولا حبة سوداني. ده ايه النيلة دي. ليه هو اللي هتجوزه كان من بقية اهلي...
لالالا انا اكلم البنت عطيات اه تصرف نظر خالص. يقطع الجواز وسنينه هو بعد العمر ده كله ابيع العزوبية ببلاش. يخرب بيتك يا بنت يا عطيات..........
