Monday, June 20, 2011

" جريمــــة في أواخر الصيف "


(1)
"لعبة منتصف الليل"

قبيل منتصف الليل بقليل جلسوا على الارضية الباردة على شكل حلقة ينظرون لبعضهم في ترقب... اكتمل العدد مع اعلان ساعة الحائط العظيمة لتمام الثانية عشرة... كانوا سبعة زملاء في عمل واحد... قرر كل منهم الاشتراك في اللعبة لانهاء خصمه... دارت الزجاجة الفارغة في وسط الحلقة.. توقفت الانفاس وجحظت العيون تتابع في خوف قاتل.. وفي لحظة استقرار فوهة الزجاجة دوت صرخة مزقت سكون الليل...
- ااااااه... قفلتيه ليه قفلتيه ليه.. البطل كان حيموت ويشرحوه نسايل نسايل
- ده انا اللي هعملك كفتة واخلص
- ليه كده بس يا حاجة
- انت بستعبطي يابت انت.. انت مش عندك مقابلة شغل بكرة ولازم تروحي مصحصحة
- يادي الغلب هي يعني المقابلة دي اللي حتفرق
- يابت انت عاوزة تموتيني ناقصة عمر
- لا ماتخافيش يا حاجة محدش بيموت ناقص عمر
(وهنا تطير في وجه سمية وسادة طايشة وتستقر على رأسها)
- خلاص يامه حرمت وبلاش عنف مش هيجيب نتيجة معايا اه انا بقولك اهوه
- يا سمية يابنتي ما انت لازم تشتغلي يعني عاجباك عيشتنا كده.. من يوم ما مات ابوك واحنا معاشه يادوب مقضينا لقمة يوم بيوم ونعمل جمعية علشان الكسوة من السنة للسنة. لا عارفين نبيض البيت ولا نشم نفسنا ولا حتى نشيل نوبايل زي بقية خلق الله علشان مانقدرش على مصاريفه
- ايون هي الحكاية كده قولي بقى من الاول يا حاجة انت عينك في النوبايل ماشي يامه ايكش بس عمك الباشا فريد بيه يكون موصي عليا بذمة المرة دي مش زي كل مرة
- ماهو انت يا موكوسة لو بدوري على شغل بذمة مكانش ده حالنا نسأل اللي يسوى واللي مايسواش ونطلب الرضا والسماح. قال ايش تعمل الماشطة في الوجه العكر
- يامه حرام عليك الساعة اتنين الفجر اجلي خطبتك العصماء الخطبة لبكرة الصبح واعتقيني لوجه الله
- ماشي يا أخرة صبري لما اشوف اخرتها.. قدامي
(وبعد ان اطمأنت سمية الى ان والدتها تغط في نوم عميق تحركت من السرير بخفة ومشت على رؤوس اصابعها حتى وصلت الى الصالة وفتحت التلفاز لاستكمال الفيلم في نفس اللحظة التي سمعت فيها صرخة مدوية قادمة من غرفة النوم حيث تنام والدتها)

---------------------------------

(2)
"المرأة الحديدية"

قومي يا سمية.. يا سمية قومي.. يابت اصحي مش هقضي كل اليوم اصحي بجنابك انا مش فاضيالك
- اصحى هو انا نمت من اساسه ده انت بعدما سيبت ركبي هينقطع عني النوم شهر بحاله
- احسن علشان تبقي تغافليني مرة تانية فاكراني نايمة على وداني
- تقومي تصوتي في نصاص الليالي يا نعمات
- والم عليك امة لا اله الا الله لو ما قومتيش حالا ونزلت الشغل
- لا وعلى ايه الطيب احسن انا نازلة بكرامتي
(اقتربت سيارة الاجرة من مدخل الشركة ذي البوابة الحديدية العظيمة .. وبعد الحصول على اذن الدخول انعطفت السيارة في الطريق المؤدي الى اعلى التل حيث ربضت الشركة بمبناها الضخم في منظر مهيب.. اخرجت سمية راسها من النافذة وهي تحدق بصفوف الاشجار على جانبي الطريق... سرعان ما انتهت الرحلة لتستقر سمية على احدى المقاعد في قاعة الانتظار الفخمة.. ولاحظت على الفور علامات الارتباك والقلق على السكرتاريا والطاقم الامني)
- يا انسة ولا مؤاخذة يعني انا بقالي نص ساعة ملطوعة هنا الا مافي حد عبرني ولا بل ريقي بكلمة.. ولا ساقع ولا شاي... هو فيه حاجة؟
- ااايششششش
اايششش! طيب... يا انسة هو الساعة معاك كام!! هو انتم ماتعرفوش فريد بيه باشا
- يا انسة...
- محسويتك سمية ابو برشامة.. لا اوعي تفتكري حاجة غلط اصل جدي كان عطار.. دكتور قد الدنيا الله يرحمه ساب ابويا على الحديدة انما ماتجوز على الميت غير الرحمة.. اييييه دنيا
- يا انسة انت بتبرطمي بتقولي ايه
- لا ولا حاجة.. كنت بقول يعني انا ملاحظة حركة غريبة في الهول هو ده العادي بتعكم ولا في حاجة؟؟
- انسة سمية القاعدة نمرة واحد للموظف الناجح "لا ارى لا اسمع لا اتكلم" لو عايزة تعمري في الشغل ركزي في نفسك وبس... اتفضلي معايا
(تقودها السكرتيرة الى مكتب فخم في الطابق الثاني وتدخلها حجرة جانبية حيث جلست سيدة في متوسط العمر... اخذت السيدة تقلب في ملف امامها ثم توقفت فجأة ورمقت سمية بنظرة ثاقبة)
- انت ليسانس اداب مش كده
- ايوه يا افندم
- وماعندكيش خبرة خالص
- ميح وبلاطة انما انا حربوقة واعجبك بتعلم بسرعة وبنت سوق و...
- ماشي ماشي خلاص.. اتفضلي استلمي الشغل من الانسة سحر المكتب التاني على اليمين وانت خارجة
- ربنا يكرمك يا فندم ويعمر بيتك ويعلي مراتبك كمان وكمان وان شاء الله اكون عند حسن ظنك و...
- خلاص خلاص اتفضلي
(تتحرك سمية باتجاه الباب ثم تعود ادراجها وعلى وجهها علامات التعجب والشك)
---------------------------------

(3)
"شكوك"
- هو لا مؤاخذة يافندم يعني انا لا عملت امتحان ولا حد سألني حاجة ولا مليت ورق هو انا اتقبلت في وظيفة ايه بالضبط!
- بصي يا انسة سمية لو كنت جيتي هنا في ظروف احسن من كده مكنش ممكن ولا في احسن احلام اليقظة بتاعتك انك حتى تعتبي باب الشركة لكن لحسن حظك ان احنا محتاجين اي حد يملا الشاغر ومش هنقدر نستنى اجراءات التوظيف المعقدة هنا
- لا انا كده جيش فيران ابتدى يلعب في دماغي هي ايه العبارة بالضبط لو الحكاية فيها ملعوب الله الغني وارجع لطوابير القوى العاملة وانا عملت حسابي ومكاني محفوظ في الطابور
- ههههه طوابير القوى العاملة هو لسه في حد بيشتغل بالطريقة ده اوله القاهرة واخره بلاد الواق واق
- يا سلام ياختي دلوقت معدتش القوى العاملة تعجب تعملكم ايه الحكومة يعني ما انتم السبب
- احنا! ازاي بقى
- بطلوا خلفة بقى خدوا اجازة مثلا اربعين خمسين سنة. ده الحد اللي فات صحيت على صوت الوليه ام زوقلط زغروتها جايبة اخر اسوان طلعت عليها امي تشوف مالها قال ايه الوليه بتقولها انه جوزها الحاج بيومي طلع معاش في نفس ذات اليوم اللي زوقلط جاله كتاب التعيين في القوى عاملة فهتجوز الواد علشان يادوب يلحق يخلف عيل يستوظف يوم ما يطلع ابوه على المعاش وده اللي بنسميه العدالة الاجتماعية وعمار يا مصر!
- وسي زوقلط ده عنده كام سنة
- مافيش ياختي همه كلهم على بعض مايجوش خمسين سنة
- وعاوزه ترجعي الطابور
- مش احسن ما اشتغل اونطه ما اتأخذينيش يا ست هانم انا قلبي مش مطمن وخصوصا انك لسه قايلالي انه الوظيفة دي مكنتش احلم بيها يبقى تدوهاني ليه
- اولا علشان اطمنك الوظيفة دي هي سكرتيرة شخصية لمكتبي يعني هتبقي دراعي اليمين في الشغل والمرتب تلات الاف جنيه في الشهر
- يا سنة سوخة مخلله ببرنجان ليه هو احنا هنهرب اثار ولا هنضرب عملة
- ايششش ايه الكلام المعوج ده لالا انت بتتكلمي كتير والتفاهم معاك صعب خالص فريد باشا ما قاليش كده
- استني بس ما تتزربنيش بسرعة كده
- ايه تت ايه
- يوووه نسيت يا ست هانم
- انسة سمية لازم تفهمي انه ده مكان شغل محترم ودي فرصة الف مين يتمناها وانا معنديش وقت اكتر من كده اضيعه ها عاوزة الوظيفة ولا نشوف حد تاني
- سؤال واحد اوعدك بعدها هاقفل بقي خالص ومش هتسمعي غير حاضر يافندم
- اللهم طولك يا روح سؤال واحد بس اتفضلي
- هو ايه الظروف اللي رمتكم على اشكالي اقصد ايه الاشكال يعني
- مافيش تلات بنات  في الوظيفة دي ماتوا بطرق مختلفة فالموظفين قالوا عليها نحس!
- يا نهار أبوكي لوبيا على بامية قرديحي!!!
---------------------------------
(4)
"القرار"
- ها طمني قلبي يا بت بطلي ملاوعة اتقبلتي في الوظيفة ولا هتقعدي تاني في قرابيزي
- قرابيز! ايه الكلام ده يامه
- فوتي يابت ها عنب ولا عدس
- ده بسبوسة وشهد يام سمية احنا هنتنقل لمستوى تاني خالص هنطلع لفوق فوق
- البت لسعت انا سألت سؤال تردي عليا بالغاز عاوزالها سلم علشان اوصل لفوق بتاعتك دي
- اسكتي يامه اسكتي انا لسعت فعلا بعد اللي شوفته دي مش شركة دي بلد بحالها مكتبي يامه قد شقتنا مفروش احسن فرش والمرتب المرتب يامه اخاف اقولك على المبلغ مرة واحدة يغمن عليك
- يا سلام قد ايه يعني اكتر من مرتب البت عفاف
- عفاف مين بقولك هيغمن عليك يا نعمات امسك نفسك... تلات تالاف جنيه
- في السنة ده يا بت يطلعوا كام في الشهر
- هو في الشهر يا نعمات تلات تالاف جنيه كل اول شهر
(تقبض نعمات على زمارة رقبة سمية وهي تصرخ) انطقي يا بت هيشغلوك في ايه رايحة لفين يا بت بطني
- طيب سيبي رقابتي هفيص بين ايدك يا وليه
- قولي انطقي
- طيب اقعدي كده واستهدي بالله وانا هاقر على طول......
 ...................
- ومعرفتيش البنات دي ماتت ازاي
- كل حدوتة شكل يامه الاولانية ماتت من يجي تلات شهور كانت رايحة المول تشتري شوية حاجات عمود علب فول من ستين دور وقع عليها عقبال ما لحقوها كانت اتهرست خلاص مالحقوهاش التانية كانت رايحة تقيس فستان فرحها عند الخياطة وهي هناك الاتيليه كله ولع اتحرق وقلب فحمة سودة انتشلوها وكانت الله يرحمها بقى
- يا كبد امها
- اما التالتة بقى فدي خرجت مغربية تشتري سجاير رغم انها ما بدخنش وما رجعتش ليلتها امها قلقت عليها وبلغت وبعد اربع ايام لقوا جثتها في النيل ومفيش اي اثار لاعتداء او ضرب او اي حاجة والبوليس كتب في المحضر انه المذكورة قررت تنهي حياتها فرمت نفسها في النيل انتحار يعني
- يوه ودي معقولة برضه يعني خرجت تجيب سجاير مابتشربهاش قامت ميلت على النيل ورمت نفسها الحدوتة فيها انه
- هي ان وبس دي ان واخواتها وبنات خالاتها والجيران كمان لكن محدش يعرف حاجة اكتر من اللي اتقالت
- طيب وبعدين
- ولا قبلين انت شايفة يامه اي حاجة غريبة تحوشني عن الوظيفة دي
- بصراحة مافيش غير انك تتوكلي على ربنا وتاخدي بالك من نفسك وربنا يستر
- هو ده بالضبط اللي انا هعمله افنجل عنيا واطرطق وداني وادعبس على الحقيقة ومش هانسى اعمل عبيطه علشان محدش يشك بيا!
---------------------------------
(5)
"عنبر 73"
- صباح الخير يافندم
- صباح الخير يا سمية ها ايه الاخبار
- كله تمام يافندم خط واحد وخمسين رجع يشتغل تاني واسطى محمود بعت تقرير المكن اللي محتاج تغيير وقايمة بقطع الغيار
- وعنبر الغلايات اخباره ايه
- جاري تطهير العنبر وتقرير شامل عن الحالة في البوسطة قدام سعادتك
- انت بتتعلمي بسرعة يا سمية رغم انه الشغلانة دي بعيدة عن تخصصك لكنك اثبت كفاءة فعلا
- يعني حضرتك مبسوطه مني
- مش المهم ان انا اكون مبسوطه منك المهم انك تقدري تملي مركزك
- طبعا اكيد بالمناسبة يافندم كنت عاوزه انزل عنبر تلات وسبعين اطمن على سير الاوضاع مع المكن الجديد
- لا طبعا ممنوع بتاتا ممنوع يا انسة اوعي اسمع انك عتبتي هناك انت فاهمة
- ليه بس يافندم العنبر ده دلوقت شغال بشكل ممتاز و..
- لا يعني لا يا سمية مش من ضمن شغلك انك تنزلي العنابر ده شغل المهندسين اللي تحت
- لكن انا ممكن اساعد
هي كلمة واحدة لا. اتفضلي على مكتبك
.............
- هاي يا سمسم اخبارك ايه
- اهلا يا شرين اقعدي
- اهلا يا شرين اخص عليك هي دي مقابلة برضه طبعا ماهو خلاص كبرنا ومعدناش شوفنا الغلابة اللي لسه واقفين في اول السلم
- ما تقوليش كده يا شيرين انت عارفة غلاوتك عندي ده لولاكي لا كنت طلعت السلم ولا شفت اول عتبة حتى وانا اقدر أنسى مساعدتك ليا 
- اومال مالك مسهمة كده ليه
- اصل في حاجة غريبة بتحصل هنا وهموت فرس على ما اعرف
- يا بت بطلي الفضول ده انت ما سمعتيش الفضول بيقتل صاحبه ثم انا مليون مرة حذرتك لو عاوزة تاكلي هنا عيش ما تسأليش في الملكيش فيه
- ماشي ماشي لكن انت صاحبتي واستاذتي هنا وتقدري تريحيني
- عاوزة ايه يا سمية قصري
- عنبر تلات وسبعين
- يا نهار اهلك مطين ايه اللي وصلك هناك
- انا ما وصلتش ده انا يادوب بقول لمدام جلنار عاوزه انزل العنبر اعمل جولة وهي قبيلة عفاريت بقيت تتنطط في وجهها واتزربنت عليا
- ومش عاوزاها تتزربن ده كويس قوي انها اكتفت بالزربنه ثم تعالي هنا ايه اللي ينزلك هناك اصلا ده مش شغلك
- يوه هي الجملة دي محفظينهالكم في النشيد الوطني للشركة مش شغلك مش شغلك مش شغلي ليه ده العنبر الوحيد اللي ما بتوصلش منه تقارير رسمية مع انه عائداته زي الزفت ومحدش عامل حاجة
- اسكتي كفاية والموضوع ده تقفلي عليه بالضبة والترباس فاهماني يا سمية
- لا بقى كده حرام انا لو ماعرفتش العنبر ده ماله ممكن مواسير المرارة عندي تفرقع وتطرشق على الكولون وتبقوا انتم السبب
- اسمعي يا بنت الناس خليك في اكل عيشك وما تنسيش الكراسي هنا والترابيزات ليها ودان احنا في كافتيريا الشركة ها
- ده اسمه قمع انا هشتكي لحقوق الانسان وهيئة الأمم
---------------------------------
(6)
"جريمة مبكرة"
(تدخل سمية الشركة صباحا كعادتها وتلاحظ على الفور هدوءا غير طبيعي وحركة مريبة على الطاقم الامني ذكرتها بيومها الاول في الشركة اتجهت نحو مكتبها وكان باب مكتب مدام جلنار مواربا دخلت المكتب وكانت مدام جلنار منكفئة على مكتبها وقد وضعت رأسها بين كفتيها)
- احم صباح الخير يافندم هو حضرتك مصدعة ولا ايه
- ايوه مصدعة شويه
- تحبي اطلبلك قهوة او اجبلك اسبرينه
- لا متشكرة انا هبقى كويسه اتفضلي انت على مكتبك ومش عاوزه حد يدخل عليا وما تحوليش اي تلفونات النهاردة
- طيب...
- سمية اعملي اللي قولتلك عليه
- حاضر يافندم
(تخرج سمية وهي مستغربة لما حدث وتكلم نفسها) هو ايه اللي حصل انا لازم اعرف فيه ايه
- سمية بتعملي هنا ايه وازاي سايبة مكتبك
- الحقيني يا شرين هطق من جنابي واعرف ايه اللي بيحصل هنا
- يا مجنونة انت عاوزة تودي نفسك في داهية
- تعالي بس محدش واخد باله
- ساحباني على فين
- الريسبشن مليان امن ومحدش هياخد باله منك تعالي
(تخرج بها الى الاسانسير وهي تسحبها من ذراعها ثم تضغط على مفتاح الصعود وتوقفه في منتصف الطريق)
- مجنونة مجنونة وهتوديني في ستين داهية
- بعد الشر اقولك بس
- تقولي ايه يام مخ زلابية سايبة شغلك ومجرجراني معاك وتوقفي الاسانسير في الهوا انت عاقلة يا بت
- اوعدك انزلك حالا بمجرد ما تقولي ايه اللي بيحصل تحت
- وانا هاعرف منين انا موظفة زيك بالضبط ومعنديش اي معلومات تفيدك
- يا لئيمة ده انت ام المعلومات كلها ولو حلفتي بايه مش مصدقك ومش هسيبك الا لما اعرف
- مجنونة هقول ايه ماشي انا هقولك علشان اخلص لكن بعدها ولا اعرفك انت فاهمة
- ماشي ها قولي
- حصلت حادثة في عنبر تلات وسبعين ليلة امبارح والبوليس لسه شايل الجثة النهاردة الصبح هي الحادثة غالبا قضاء وقدر لكن طبعا لازم يحققوا الاول
- يا سلام على برود اعصابك صقيع.. جردل صقيع شايلاه فوق دماغك وماشية
- ايه يابت الالفاظ والتشبيهات الرقيعة دي
- نشفتي حنكي وهموت منك بلي ريقي بتفاصيل علشان افهم الجثة بتاعة مين وفيصت ازاي والذي منه
- اه التفاصيل مافيش الرجالة نزلت العنبر الساعة تمانية زي كل يوم والنبتشي على مكنة ستة بتاعة طحن العلب المستهلكة حاول انه يشغلها كالعادة اكتشف انه سويتش الحماية مرفوع والمكنة دايرة ولما قرب يشوف جواها اكتشف الجثة اللي كانت طبعا بقايا ادمية مفرومة وعند التدقيق في بقايا الهدوم اكتشفوا انه صاحب الجثة هو عم حسين حارس العنبر
- وطبعا المفروض اللي حصل ده مجرد حادثة هو عم حسين بقاله بيشتغل هنا قد ايه
- كتير يجي اكتر من تسع سنين ابتدى عامل في البوفيه الاول واتدرج في الشغل لحد ما اتنقل للعنبر ده من حوالي سنة
- اممم
- بتفكري في ايه
فاكرة يوم ما جيتلك وسألتك عن العنبر ده تحديدا
- ايوه يومها كنت هتموتي وتعرفي سر العنبر ده
- اهو انت النهاردة يا حلوة مش هتخرجي من هنا الا لما تقولي سر العنبر ده ايه ماذا والا واحنا لوحدنا يا جميل...
---------------------------------
(7)
"سر عنبر 73"
- من حوالي سنتين كان عنبر تلات وسبعين واحد من انجح العنابر في الشركة وكان ورا قصة نجاحه مهندسة طموحة قدرت في مدة قصيرة تحول المكان لكتلة نشاط وانتاج فاقت التوقعات وفي احدى الليالي اضطر الموظفين يسهروا لتسليم طلبية ولما خلصوا قفلوا وروحوا تاني يوم الصبح البضاعة كلها كانت رجعت المخازن بسبب عيب فني في التصنيع الخسارة كانت كبيرة وصاحب الشركة كانت ردة فعله عنيفة قفل العنبر ورفد عدد من المهندسين اللي كانوا مسؤولين عن الطلبية دي ونقل المهندسة لقسم اداري وبعد حوالي اسبوع ابتدى موظفين العنبر اللي جنبه يشتكوا من ريحة مزعجة مصدرها العنبر المقفول واضطر عمال النظافة يفتحوه وهمه فاكرين على ابعد احتمال يلاقوا عرسه ميتة ولا فيران لكنهم اكتشفوا جثة  واحد من المهندسين اللي اترفدوا وكان المتهم الاول في مسألة الاهمال شانق نفسه على مكنة ستة
- طبعا اعتبر الموضوع انتحار وبعد فترة اتنست الحادثة والعنبر اتفتح تاني و  استني استني المهندسة اللي كانت مسؤولة عن العنبر هي جلنار مش كده
- ايوه عرفت ازاي
- مش محتاجة مفهومية الحالة اللي هي فيها تفسر حاجات كتير موت عم حسين في نفس العنبر قلب عليها المواجع
- طبعا هي كانت محملة نفسها مسؤولية اللي حصل
- لكن الحكاية كده ناقصة ومش مفهومة
- ناقصة ازاي انا قولت على كل اللي اعرفه
- هي ايه نوع البضاعة اللي حصلت بسببها المشكلة
- قطع غيار مكن تقريبا زي اللي بيتصنع في نفس العنبر النهاردة
- طيب ليه ليه يوم ما طلبت منها انزل العنبر اتنرفزت وارتبكت وحادثة عم حسين في التوقيت ده بالذات صدفة؟
- بلاش يا سمية بلاش تفكري كتير انت كده ممكن تضري نفسك
- الموضوع ده لا يمكن يكون صدفة ولازم يكون في علاقة بين كل المراحيم دول اللي بينهم حلقة وصل واحدة هي جلنار!
---------------------------------
(8)
"زائر الليل"



- ايه رأيك يا امي في اللي حصل ده
- سيبيها يا بنتي الله الغني
- اسيب مين هو انا بقولك علشان تقوليلي سيبي شغلك
- اومال بتقوليلي ليه علشان اقعد هنا اكل في نفسي طول ما انت في شغلك.. ياريتني ما كنت قولتلك عليها ولا اشتغلتي في الوظيفة النحس دي
- يامه ابوس ايدك خلاص انت عماله من الصبح تشاؤم طبشتي مقاديفي يا نعمات قال جبتك يا عبد الجبار تعيني لقيتك يا عبد الجبار مزنوق اكتر ممني
- انا خايفة عليك ومش عاوزاك تحدفي نفسك في التهلكة
- يعني اخد ديلي في سناني واقول ماليش دعوة واعيش جبان يامه
- انت فاكرة نفسك راجل يا ملسوعه ثم تعيشي جبانة احسن من ان انا اترحم عليكي زي ابوكي
- فاكرة ابويا مات ازاي يامه
- ايييه ودي حاجة تنتسي وقف لاهل حتته وقفة رجالة ومات موتة رجالة
- كان مصمم يقفش حرامي الغسيل اللي مشى نص اهل الحتة عريانين وفي ليلة مافيهاش ضي قمر نصبله كمين فوق سطوح ام عيشه الخياطة وفضل مكلبش في زمارة رقبته لحد الصبح
- ايون واتلمت الحتة والرجالة جهزوا النبابيت والشوم ابوكي خده المجد وراح ناطط عن السطوح اتكسرت رقبته وما نابنا من الليلة غير موته ووقفة الحال
- الله يرحمه بقى
- انت مصممه على اللي في دماغك يا سمية
- ما تخافيش يا امي بنتك ناصحة وعارفة بتعمل ايه
- يا خوفي تنزلي على جدور رقبتك يا بنت ابوكي قومي نامي الوقت اتأخر والصبح نشوف هنعمل ايه
- نشوف مين اللي يشوف ايه هي عصابة بكيزة وزغلول
- ايشش
- انا ايش وبتسكتيني يا نعمات
- اسمعي كده... صوت خروشه عند باب البيت
- صوت حاجة بتحاول تفتح الباب اجري يامه هاتي المقشة وانا هلحقك بغطا حله
(تمشي الاثنتان ببطء شديد ناحية الباب ويتواريان بجانبه ثم تزحف سمية وتقبض على يد الباب وباشارة منها الى والدتها فتح الباب وانقضت المرأتان على الشخص الغريب وفي ثوان كان راقدا على الارض دون حراك)
يتبع...
"حليف من داخل عش الدبابير" 
---------------------------------
(9)
"حليف من داخل عش الدبابير"
- يانصيبتك السودا يا سمية.. يا خراب بيتك يا سمية.. يا ايامك المدهولة يا سمية..
- يا بت هتفقعي مرارتي من ساعة الجتة دي ما تلقحت على البلاط وانت بتندبي وتولولي.. بتولولي ليه يا بت اعترفي ماذا والا
- والا ايه يامه هو هيبقى فيه اسخم من سخام وابور الجاز اللي احنا هببناه
- هباب ايه وسخام ايه احنا مش هنصوت ونلم الجيران والبوليس يجي يشيل واكيد الوليه ام ورد النجف ده انا ماسكه حرامي هاي لاي وسكعاه علقة موت
- حرامي ايه يا نعمات سلامة النظر اللي متلقح في البلاط ده انثى
- ما انا خدت بالي انها مزه ونظيفة كمان شامة الكولونيا جايانا مستحمية اهي دي الحرامية النظيفة الهاي مش الواد جعلوص المفك حرامي الجزم
- امي حبيبتي فيكي مين يكتم السر.. المزه المستحمية دي تبقى.. تبقى جلنار هانم
- جلنار مين.. جلنار اللي
- ايون اللي
- يخرب بيت كده الصبح هانم وبالليل بتشتغل حراميه.. الناس اتفجعت ولا ايه
- حرامية ايه بس انا كنت شاكك فيها من الاول وقولت لا يمكن تكون بريئة من دم البنات اللي ماتوا لكن تجيلها الجرأة تجيني لحد بيتي فدي تبقى مستغنية عن عمرها
- معقوله الكلام ده تطلع هي اللي قتلتهم طيب ليه
- اهو ده اللي هنعرفه منها بعد ما نربطها في الكرسي ونقررها ايدك معايا يامه
..........................
- ايه ده بقالي ساعة بعصر في مناخيرها مش عاوزه تفوق فحل البصل مفضلش فيه نفس
- ماهو انت السبب يا شمشون كان لازم تطلعي عزمك كله وانت بتديها على دماغها بغطا الحله
- تفتكري جالها تهتك في الجمجمة وهتفيص في ايدينا يامه
- ما تخافيش تطلعي منها زي الشعره من العجين دي كانت حالة دفاع عن النفس
- دي قلبت ريه وسكينة بتشوفي افلام عربي كتير من ورايا يا نعمات
- فاقت فاقت
- انا فين.. انت مين.. سمية
- بشحمها ولحمها هو انت كنت جايه لحد تاني وغلطتي في العنوان
- سمية الموضوع مش زي ما بتفكري
- طيب قوليلنا انت يا حلوة نفهم حومك حوالين بيتنا في نصاص الليالي ازاي
- مامة سمية مش كده احلفلك بايه يا هانم انتم فاهمني غلط انا قصدي خير وخايفة على مصلحة بنتك
- خير جايه تقتلي بنتي زي اللي قبلها وتقولي مصلحة بنتك
- اصبري يا امي بالراحة عليها نسمع اللي عندها مادام بتقول خير ولو انياشك انه يبقى خير
- جايز الزمان والطريقة اللي انا اخترتهم علشان احذرك كانوا غلط لكن مالقيتش طريقة تانية علشان محدش يحس بينا هم لو عرفوا انك بتدوري وراهم مش هيرحموكي ومش هتفرقي معاهم
- مين دول انت بتقولي ايه كلميني عربي علشان افهمك
- طيب فكيني وانا اقولك على اللي انت عاوزه تعرفيه

---------------------------------

(10)
" في منتصف الليل"

- اللي انت ما تعرفهوش يا سمية ان انا عارفه انك بتدوري ورايا وفاكرة اني متورطة في حادثة عم حسين لكن الحقيقة اني كنت بحاول احميه وحاولت احذره لكن اتأخرت قوي
- مش فاهمه بالراحة ومن الاول خالص
- انا اول ما ابتديت في الشركة اتعينت مسؤولة عن عنبر 73 كنت طموحة جدا عاوزه اثبت نفسي واكبر باي شكل كنت بشتغل اربعتاشر ساعة في اليوم وكنت حازمة جدا في شغلي كان معايا تيم من اكفأ المهندسين في الشركة وكنت قاسية عليهم ما اقبلش اي تهاون او غلط ولا اقبل اي اعذار وكانت طبيعة الشغل ونوع المنتج بتتغير كل فترة ماكنتش بهتم بنوع المنتج المهم الاوردر يجهز في معاده باي تمن.. وفي يوم جالي واحد من المهندسين وكلمني بخصوص الطلبية الجديدة قال كلام كتير وانه شاكك في نوع المنتج انه بيستعمل قطع غيار اليات عسكرية وانه النوع ده من الاليات مش موجود في مصر.. ما همنيش من كل الحوار غير مواعيد التسليم وانه الاوردر يكون مطابق للعينة الاصلية اديت اوامري للمهندس بعدم الكلام في الموضوع مع زمايله على اني اتابع التفاصيل مع الادارة
- طبعا سألتي الادارة وكان كلامه صح
- لا. نسيت اقولك رئيس مجلس الادارة وصاحب الهيلمان ده كله يبقى خالي
- مش ممكن
- ممكن. ما سألتيش نفسك اشمعنى انا من كل المهندسين اللي كانوا في القضية ليه ما اترفدتش بالعكس ده انا اترقيت بعدها مباشرة
- اه صحيح طبعا ادام المدير وصاحب المال خالك
- استني يامه طيب كده انا لسه ما فهمتش هي البضاعة كانت مضروبة بفعل فاعل؟
- انت لماحة يا سمية وبتفكري صح. عنابر التصنيع في الشركة كانت غالبا بتنفذ مخططات المنتجات من غير ما توصل للمنتج النهائي
- لانها غالبا قطع غيار او قطع اولية بتدخل في تركيب اجهزة تانية احنا ما بنصنعهاش
- صح كده لكن بعض المهندسين بيستزيدوا بمعلومات وافية عن المنتج المتوقع كنوع من الخبرة وده ممكن عن طريق المخطط التفصيلي اللي بيجي مع العينة عن طريق الزبون
- وطبعا صاحبنا كان واحد منهم
- وكان على حق الطلبية كانت عبارة عن قطع غيار لنوع من الاليات اللي بتستخدمها قوات التحالف في العراق
- يا نهار اسود واحنا نعملها هنا علشان الامريكان يقتلوا بيها اخوانا في العراق
- بالضبط. الوحيد اللي خد باله كان المهندس محسن ودفع التمن غالي
- انت كنت تعرفي
- انا كنت عميا وفتحت متأخر جدا. فضلت اماطل محسن واتحايل عليه يكتم السر لحد ما نتأكد كنت بحاول اكسب وقت وانهي الاوردر وبعدها افكر اعمل ايه لكن هو كان اذكى مني بدل قطعة في المخطط الاصلي كان من المستحيل حد يكتشفها وبكده ضمن عيب دائم في المنتج
- وحبايبنا اللي استلموا البضاعة اكتشفوا الملعوب
- ايوه وخالي ليلتها اصيب بجلطة بسبب الخسارة الكبيرة وفضيحته في السوق
- لكن المهندس محسن اتقتل ازاي
- محدش يعرف العنبر كان وقتها اتقفل وخالي سافر بره لاستكمال العلاج واستعوض ربنا في خسارته
- على فرض ان انا مصدقك ايه علاقة اللي حصل بحادثة عم حسين
- قبل الحادثة بيومين لقيت عم حسين بيستناني في مدخل الشركة وكان قلقان ومن غير مقدمات قال انه عارف قاتل الباشمهندس محسن ومعاه الدليل...

---------------------------------
 (11)
"الدليل"

- طلبت منه يقولي على القاتل ارتبك واتلفت حواليه زي مايكون حد مراقبه قالي انه لازم يمشي واتفقنا اشوفه تاني يوم عندي في البيت لكن في نفس اليوم جاتلي مكالمة غريبة.. كان الشخص اللي كلمني بيحذرني من عم حسين قال انه راجل كبر وخرف وعاوز يصحي الاموات وانه من مصلحتي ابعد عنه
- وبعدها حصلت الحادثة اللي البوليس بيأكد انها قضاء وقدر
- مافيش جريمة كاملة لكن احنا بنتعامل مع قاتل محترف
- لكن ليه القتل ده كله وكلها مجرد حوادث لا يمكن اثبات وجود شبهة فيها
- علشان كده انا جايالك احذرك. كفاية دم حرام يكون مصيرك زيهم
- لسه اسئلة كتير محتاجة اجابة مثلا ما مدى تورط خالك في الموضوع وايه علاقة البنات اللي اشتغلوا معاك باللي حصل وغيرها
- في تفصيل صغير ماقولتوش.. خالي ما عرفش بكل الحكاية الا بعد حادثة محسن
- يعني ايه
- يعني حسب نظام الشركة المجلس التنفيذي ممكن يجيب شغل وينتج من غير الرجوع لرئيس مجلس الادارة خالي اكتشف نوع البضاعة بعد ما رجعت المخازن واكتشف نوعية الزباين برضه متأخر
- طيب ومحاولش يتخذ اي اجراء في المسؤول عن الطلبية دي المجلس فيه خمسة مديرين بتوقيعات معتمدة من السهل اكتشاف المتورط في العملية دي
- طبعا باستثناء مشكلة واحدة.. التوقيع على الطلبية كان باسم خالي محرم باشا وتوقيعه
- يبقى الورق مضروب
- صح
- طيب ليه ما بلغش
- يبلغ على مصيبة زي دي ازاي احنا شركة للتصنيع المدني ودي بضاعة عسكرية
- اخص اللي عملها ابن شياطين
- مدام جلنار انت جبارة.. كل اللي بيحصل حواليك وانت ولا هنا
- يقولوا جبانة ولا يقولوا الله يرحمها
- يا جماعة اللي اتلسع من الشوربة ينفخ في الزبادي
- يعني ايه
- يعني دي حارة سد وخلاص على كده مغامرتك انتهت يا سمية. اسمعي يا بنت الناس يا تعقلي وتركزي في شغلك يا.. ترجعي طابور القوى العاملة...

---------------------------------
 
 (12)
مغامرة اخيرة


- صباح الخير يا فندم.. من فضلك تمضيلي الورقة دي
- ايه دي يا سمية انت شايفه ان ده حل مناسب
- مش احسن ما اودي نفسي للتهلكة
- ده مش كلامك يا سمية
- ما عدتش تفرق
- وهتعملي ايه
- هدور على شغل واكيد هاستفيد من خبرتي عندكم
- ربنا يوفقك انت تستاهلي كل خير
- انا ماشية.. ممكن اسأل حضرتك سؤال اخير.. انت تعرفي القاتل صح
- انت بتتكلمي عن ايه قاتل مين
- قاتل المهندس محسن وعم حسين
- انا مش عارفة انت بتتكلمي عن ايه بالضبط. انسة سمية من فضلك راجعي الشؤون القانونية علشان براءة الذمة وانا مش حانسى مكافئئتك
- كده.. اشوف وجهك بخير...
..................
- سمية.. مالك يا بنتي مسهمة كده ليه
- سيبيني في حالي يا شرين انا هطق من الغيظ
- تعالي تعالي احكيلي جرالك ايه
- انا خلاص دماغي هتفرقع من كتر التفكير محتاجة اجازة مفتوحة علشان انسى الهم ده
لا ماينفعش كده تفاصيل قولي كل حاجة... (تقوم سمية باخبار شرين بما توصلت اليه من معلومات وكيف طلبت منها جلنار كتم المعلومات)....
- كده القضية اتعقدت اكتر.. انا اراهنك انه جلنار متورطة في الحوادث دي كلها بدليل انها اخر واحدة كانت مع المهندس محسن قبل موته وهي برضه كانت اخر واحدة شافت عم حسين وكلمته قبل الحادثة... سمية انت سرحت فين
- ها لا ابدا بفكر
- ونويت على ايه دلوقت
- سيبك من الكلام ده.. تعرفي انا احسن حاجة اخد الورق اللي معايا واطلع بيه اسكندرية عند خالتي واهو اقعد على الشط ادرسه براحتي بس يا رب ما تيجي نوة وتحدفني البحر لاحسن ما بعرفش اعوم
- ورق.. ورق ايه اللي معاك
- ايششش وطي صوتك ده ورق القضية القديمة سرقته من جلنار وانا معاك فعلا هي لازم تكون لها يد في الحوادث دي
- فعلا احسن حل تخفي عن عينها لاحسن تعمل بيك حاجة
- تعرفي انا مش عاوزه اطلعلها اخاف اقدملها الاجازة ترفضها علشان افضل تحت عينها.. ممكن تقديمهلها بدالي وانا حاكتبهالك اهو ادي النموذج.. مكان الاقامة خلال الاجازة.. المدة.. الامضاء.والله انا خايفة انها تزعل بقولك ممكن تبلغيها اني هجيبلها معايا جمبري بتلات وسبعين جنيه.. مش هنسالك الخدمة دي يا شرين اشوف وجهك على خير
- بالسلامة يا حبيبتي.. بالسلامة...
...................

المشهد الأخير
(قاربت الشمس على المغيب وبدأت بعض النسمات الباردة تشق طريقها نحو امواج البحر.. جلست سمية على هضبة صخرية تتأمل انكسار الامواج عليها وتطل بين الحين والاخر على بضع وريقات في يدها)... 

- منظر شاعري بصحيح ميه وهدوء وسما صافية
- انت.. انت بتعملي ايه هنا
- انا جايه اساعدك نحل اللغز سوا
- بس انا خلصت خلاص والحدوتة كده خلصت
- تقصدي ايه
- اقصدك انت يا جميل وعندي ادلة كافية تشد حبل عشماوي حوالين رقبتك
- اظن مش هتلحقي لانك على موعد على العشا مع سمك البحر لكن المره دي تحت البحر ياجميل
- عملتيها يا شرين وانا اللي اتخدعت بيك وافتكرتك صاحبتي
- البيزنيس مافيهش صحوبية كان المفروض تتعلمي الدرس وما تحشريش نفسك في اللي مالكيش فيه
- لا اسمع لا ارى لا اتكلم مواصفات الموظف الناجح قد ايه كنت غبية كان المفروض اشك بيك من الاول انت الوحيدة اللي كانت تعرف كل حاجة وممكن توصلي لاي حد من غير ما تثيري حواليك الشبهات لكن ليه ده كله
- انت فاكراني عبيطة زيك اطلعها سلمة سلمة وادفن عمري في وظيفة معاشها يادوب يجيب جوز جزم محترم انا بصفقة واحدة عملت مبلغ يكفيني علشان يبقى عندي شركتي الخاصة وادخل عالم رجال الاعمال لولا المهندس الغبي اللي اكتشف تزويري لامضة محرم باشا على الاوردر الاخير اضطريت اضحي ببضاعة بمية وخمسين الف جنيه علشان اخلص منه بعدها من غير ما حد يشك بحاجة... لكن انت عرفت ان انا القاتل ازاي؟

- دي كانت سهلة انت في اخر مرة اتكلمنا قولتي انك بتشكي في جلنار لانها اخر واحدة شافت عم حسين والمفروض المعلومة دي محدش يعرفها الا جلنار وانا ووالدتي والشخص المجهول اللي هددها ليلة الحادثة
- طول عمرك ذكية يا سمسم
- اما اللي بعدها فمش محتاجة تفكير عم حسين كان شاهد على الجريمة فدفع حياته التمن
- الراجل العجوز فضل يبتزني مدة طويلة لحد ما اقرفت منه
- والبنات...
- الاولانية كانت تعرف اكتر من اللازم والتانية كانت شايفه نفسها ومستفزة حبيت ادلعها قبل فرحها
- والتالتة
- دي كانت مجرد غلطة سوء تفاهم يعني
- ياه يا شرين بالبساطة دي وهتفضلي لحد امتى تقتلي في خلق الله
- لا ما خلاص انت اخرهم يا حبيبتي انا اخلص واقوم بالواجب مع الست الحاجة وبعد العزا اخد اول طيارة وافك بره وابتدي حياة جديدة.. ما توجعيش قلبي بقى ها تنطي في المالح لوحدك ولا محتاجة زقة من المسدس اللي في ايدي.. هاتي الورق ده.. (يبدأ العراك بين سمية وشرين ينتهي بوقوع سمية في البحر وتحاول عبثا مقاومة الموج ثم يبتلعها البحر...)
- ارمي المسدس وارفعي ايديكي ولا حركة.. مافيش داعي للمقاومة سلمي نفسك يا شرين
- انا يا حضرة الضابط كنت بحاول احميها من نفسها لكن ما لحقتهاش انتحرت اهئ اهئ
- وفري كلامك ده للنيابة احنا سجلنا كل حاجة
- لا لا...

(وعلى الجانب الآخر...)
- يخرب بيت سنينك يا شيخة هموت من البرد ايه اللي اخرك
- اعمل ايه الطريق من القسم لهنا كان زحمة
- لا يا شيخة وافرضي اني ما بعرفش اعوم اغرق انا علشان الزحمة بتاعتكم
- لا ما انا عارفة انك بتعومي كويس
- اشمعنى
- بامارة السي في بتاعتك اللي انت كاتبة فيها انك بطلة الجمهورية في السباحة
- انت لسه فاكرة يا مدام جلنار
- ودي حاجة تتنسي.. حمد لله على السلامة.. بقولك ايه ليا بذمتك عشوة جمبري بتلات وسبعين جنيه
- انا مش عاوزه اسمع الرقم ده تاني اااااابدا


تمت