ايوه العنوان صحيح وانا حضرة معالي الوزير اللي كان واقف جنب الحيط بالشورت والفانيلة زي العيل المتذنب والحرامي لازق في ظهري مسدس.. واكتشفت بعد خمس دقايق انه سلاح الجريمة اللي اتهددت بيه كان عبارة عن كوز درة!
هتسألوني الحكاية دي بجد ولا هزار اقولكم انها جد وحصلتلي فعلا... تقولوا طيب الحراسة فين والشغالين فين اقولكم انه الداخلية - يعني الست حرمنا - بعتها تصيف هي والعيال في مارينا.. ماهمه كاتمين على نفسي طول السنة ومن حقهم يخدوا اجازة... والشغالين ادتهم اجازة برضه... لا اوعوا تفهموني غلط وتقولوا غاب القط العب يا فار... كل الحكاية كنت عاوز اريح دماغي شوية... طبعا عاوزين تعرفوا كنت بعمل ايه بالشورت والفانيلة بعد الواحدة صباحا... اقولكم اني زي اي انسان طبيعي خففت لبس لما لقيت الحرارة وصلت 42 درجة في ليلة شديدة القيظ في واخر اغسطس... سامعك ياللي بتقول ومشغلتش التكييف ليه معاليك... اقولك وكلي تواضع باني راجل بتأثر جدا بالاعلام الهادف... من كام يوم شوفت الاعلان بتاع ترشيد الطاقة وفكرت اني ممكن اخدم مصر لو خففت من استهلاك الطاقة وابتديت بالتكييف...
لا ماتقفلش الموضوع وتخرج.. سيبني اقول الكلمتين واسمعني ما انا ياما سمعت همومك وشكاويك وياما ناقشتها في الوزارة علشان اشوفلك حل... من حقي عليك تسمعني... ماتقفلش بقى وتخرج قبل ما اكمل...
انا عارف انك قرفتني ومليت من كلامي واكيد لو طلعتلك في الراديو على الصبح في احدى خطبي العصماء تروح رازع الراديو وتلعن ابو اللي جابوه... ولو شفتني في التلفزيون غالبا تقلب على محطة تانية تطلعلك فيها هيفا ولا البنت التانية المعصعصة اللي تقعد تتمايص على واحدة ونص.. انا بتكلم في ايه.. يظهر خرجت عن الموضوع... احم... كنت بقول اني لازم اتكلم ما انا يا اتكلم يا حطق وافرقع... ما انا انسان برضه ومواطن عادي زيكم عندي مشاعر وهموم وكفاية قوي حوار الطرشان اللي مجبر اسمعه في المجلس والوزارة كل يوم لحد ما بقى عندي ورم في وداني وروماتيزم في لساني...
بقالي في الوزارة اتناشر سنة ماحدش عاوز يسمعني والكل متهمني وانا راجل شريف فملقيتش قدامي غير الحرامي اللي حظه العاثر رماه قدامي ليلتها واستسلم لتهديدي ليه مستخدما شبشب فردة شمال وقعد على الكنبة يسمعني...
ماتفهمونيش غلط... دي مش حكاية سياسية دي حدوتة انسانية ابتدت في ليلة صيف لما معاليه قام يدور على كوباية ميه...
-----------------------------------------------------
كنت مدايق قوي ليلتها على غير العادة اصلها اول مرة انام من غير تكييف والرطوبة عاملة عمايلها... وناموسة رزلة وقفت على مناخيري وهات يا لسع ورغم اني نزلت الشاور مرتين لكن على الفاضي... كان ريقي نشف... الله يكرمك يا عم ايوب ماكنش ينام قبل مايحطلي كوباية الميه المعدنية جنب السرير... نزلت المطبخ ادور على حاجة باردة تبل ريقي... وانا غاطس في التلاجة واذ حاجة شبه الماسورة لزقت في ظهري وصوت خشن بيقولي
ولا حركة لاحسن اضرب في المليان.. بشويش ومن غير عنف اخرج من التلاجة واقفل الباب وراك
نفذت الامر بهدوء ومن غير مقاومة ماهو العمر مش بعزقة والوزارة محتاجاني.. واقتادني الصوت لحد الصالون ووقفت جنب الحيط وانا بفكر بطريقة اخلص بيها نفسي من المعتدي المجهول... وبحركة سريعة ومدروسة لفيت ناحيته وفي اللحظة اللي ارتفعت بيها رجلي في وجهه كانت ايدي بتمسك سلاحه وتلزقه في صدره...
وحمدت ربنا لاني خدمت في القوات الخاصة ايام شبابي طبعا في ذات اللحظة اللي اكتشفت فيها كوز الدرة اللي في ايدي!
رسمت على وجهي علامات الصرامة وبصوت تخين قولت للراجل اللي انا ماسكه من هدومه
انت مين ودخلت هنا ازاي
انا... انا...
انت حتتكلم ولا اطلبلك الامن
لا يا باشا مافيش داعي ده انا حتى لسه ماخدتش حاجة
يعني حرامي وبتعترف انك اقتحمت بيتي بنية السرقة
يا باشا انا حرامي على باب الله وفي رقبتي كوم لحم اعتقني لوجه الله واوعدك ماهوبش ناحية القصر ده تاني
انت عارف ده قصر مين
عدم اللامؤاخذة يا باشا هو انا جاي اناسب صحابه... انا بلقط رزقي وماليش في اللي مايخصنيش
يعني انت ماتعرفنيش... ماشوفتنيش قبل كده
وحشوفك فين يا باشا انا اول مرة انزل المنطقة دي
يا بني ادم انا معالي الوزير
وزير! يعني هتوديني ورا السمس يا باشا لحد ما اعفن... طيب يرضيك عيالي يتشردوا من بعدي
مش احسن مايكبروا والناس تعايرهم بانه ابوهم حرامي
على الاقل انا حرامي شريف يا باشا عمري ما مديت ايدي على مال يتامى ولا ارامل ولا بسرق ولاد حتتي.. انا باخد من القطط الشبعانة على قد حاجتي الدور والباقي على اللي عينه مايملهاش غير التراب ولا مؤاخذة
وهنا لقيت الحرامي بيبصلي من فوق لتحت وفي كلامه تهكم وكأنه بيرميلي سنارة... وغمزت
انا عارف انت تقصد ايه وتلقيح الكلام ده على مين... شوف يا ابني انا طول عمري وزير شريف عمري ما مديت ايدي على مليم من فلوس الوزارة اللي انا ماسكها... والكلام اللي بتسمعوه في المعارضة والصحف الصفرا ده كلام مغرض وراه جهات اجنبية هدفها زعزعة الامن وخلخلة ثقة المواطن بالحكومة
هههههه يا باشا نفض انا مش قد الكلام الكبير ده... كلنا عارفين انه الكراسي الكبيرة دي بيبقى فيها سبوبة حلوة والمسؤول من دولن لما يشبع يهبشله لهطة كبيرة يدفنها في بنوك سويسرا كام سنة وبعدها يخلع من البلد ولا مين شاف ولا مين دري
ايه اللي انت بتقوله ده يا جدع انت... ايه لهطة ويهبش ويخلع... وايش عرفك انت يا صعلوك ببنوك سويسرا... انت اكيد مدعي
يا باشا انا لا مدعي ولا وكيل نيابة انا اغلب من الغلب نفسه... طيب اقولك على حاجة انت تمام وميه ميه كبر دماغ بقى وسيبني اتكل على الله وانا مش حجيب سيرة لحد اني شوفتك ولو حد سألني عن اي وزير بعد كده اقوله انهم اجدع ناس
تمشي فين يا جدع انت هو دخول الحمام زي خروجه... ثم انت بتاخدني على قد عقلي يعني ايه اجدع ناس دي
لا يا باشا ماتفهمنيش غلط انا اقصد بس كل حي يشوف مصلحته
لا انت مثال سيء للمواطن المصري الاصيل وانا هاعرف ازاي اعملك غسيل مخ في ليلتك دي وزي ما انت شايف ماوراييش حاجة غيرك
وهنا تدلت شفتا الحرامي وفتح بقه كناية عن استهجانه للفكرة
يا باشا انت وزير ايه باظبط... لا لا ماتقولش انا عرفت انت وزير المواصلات صح... اه عرفتك انتوا بتوع المصري اللي على حق يقول للغلط لأ مش كده
لا يا سيدي مش كده.. مش مهم انا بمثل انهي وزارة المهم المواطنة اللي على حق
اهو مانا قولت كده برضه
انا بلا فخر بقالي اتناشر سنة وزير والحقيقة خدمت في اكثر من وزارة وكنت مثال يحتذى للمسؤول الحق... تعالا تعالا اقعد يا راجل وانا احكيلك...
اقعد... تحكيلي... يا باشا اعتقني الله يسترها معاك خليني اروح اشوف اكل عيشي
حتقعد ولا اديك بالشبشب ماتعصبنيش بقى... ها قولي اسمك ايه
محسوبك عبده منشار يا باشا
منشار!
اه اسم الشهرة ولا مؤاخذة اصل انا زي المنشار طالع واكل نازل واكل
واكل ايه
علق واختام على قفايا ولا مؤاخذة اصلي مسجل خطر وطول النهار من قسم لقسم سعادتك والناس هناك بتحترمني اخر احترام بس وشرفك يا باشا كل مرة اخرج صاغ صليم وانظف من الشراب بعد غسيله وعمري ما اتاخدت اداب يا باشا
احم... وفي هذه اللحظة نظر عبده وطي فجأة وجاب ناحية الشورت... ولقيتني بدافع عن نفسي واقوله
عفارم عليك يا ابني كله الا الشرف والاخلاق انا حتى لما بطلع مارينا اتعمد اني اكون محتشم ووقور... تشرب ايه يا عوض... شاي... وقمت جري استر نفسي ببنطلون...
--------------------------------------------------
الحمد لله لبست البنطلون ولقيت عبده سبقني بالشاي على الصالون...
طيب احنا كنا بنقول ايه
اتفضل الشاي يا باشا... كنت جنابك بتقول لما تصيف في مارينا بتحتشم
ايوه ايوه... شوف يا اسماعيل...
عبده يا باشا
ايوه طبعا... شوف يا عوض الناس كلها بتاخد اجازات الا الوزير... شغل الوزير بيحتم عليك تفضل صاحي 24 ساعة في اليوم يعني حتى وانا نايم كل الناس بتنام مرتاحة وانا بنام بنص عين بفكر وشايل هموم الشعب وحتى لو غفلت مابنامش يا ابني...
وطول ما انا بتكلم كان عبده الحرامي بيجيبني من فوق لتحت وبيبصلي بشك...
ايه يا عوض بتبصلي كده ليه قول ماتخافش
اصل... اصلي يا باشا انت عمال تشرحلي عن نزاهة وشرف الوزرا واللي جابوا ام الوزارة وانا شايفك لوحدك ومنفض على الاخر وبتكلمني كل شوية جبرش ... يعني مش غريبة شوية
اه فهمت... انت فاكرني من النوع اياهم اخلص من العيال والداخلية علشان العب بديلي مش كده
لا مش كده انا فاكرك من دوكهم اللي يخلصوا من الحكومة ذات نفسيها علشان يلعبوا من وراها ولو من قدامها مايخسرش برضه
ليه كده بس يا عوض بقى كل الشرح ده في النزاهة والمواطنة وتفكر فيا وحش برضه
عبده يا باشا عبده
ما انا عارف... زي ما انت شايف انا رجل نظيف وابيض من اللبن الحليب... طيب انا راضي ذمتك مش انت طبيت عليا فجأة ولقيتني في المطبخ بدور على حاجة ابل بيها ريقي من الحر... ده انا حتى قولت انام الليلة بدري ولا فتحت تلفزيون اشوف الحاجات الخايبة اللي انتوا بتتفرجوا عليها
هو احنا لو نحتكم على تلفزيون مش كان زماني عرفت انك وزير واختصرت على نفسي البهدلة دي
لالالا انت من غير تلفزيون وعايش ازاي.. خسارة انا كان ممكن اخليك تروح بالتلفزيون اللي في قدامك واهو شاشة طول بعرض لولا انه هدية من سفير اليابان للاولاد
اه... ماعلينا سيبك من التلفزيون يا باشا لكن انت باين عليك مستريح قوي ومتزبط في الوزارة بتاعتك
اه يا عوض اقولك ايه خليها مستورة... الهلمة اللي انت شايفها دي كلها تبع الحكومة القصر والعربيات وحتى العفش.. وكله راجع للوزارة لما اطلع معاش
خسارة يعني مش هتعرف تبعت الاولاد يصيفوا يا عيني
لا ماهو الشاليه اللي في مارينا ده بتاع المدام... هدية من سفير سنغافورة
بس خسارة العربية اللي واقفة قدام الباب توحفة
السودة ولا البيضة
السودة يا باشا
لا ماهيه دي مش تبع الوزارة دي هدية من وزير المواصلات الايطال لحمادة ابني
خسارة البيضة ماكنتش وحشة قوي
لا ماهيه البيضة دي بقى هدية وزير النفط الارمني لسوسو بنتي
اه... بس خسارة برضه التحف والنجف اللي في القصر يجيلهم بالشيء الفلاني
لا ماهو اغلب القطع دي وحاجات كتيرة من العفش ده كان هدايا للمدام اثناء سفرها معايا في زياراتي لاوروبا ودول شرق اسيا في مهمات رسمية طبعا
معلش يا باشا على الاقل المعاش يعيشك مستور اليومين اللي فاضلين بعد ما تطلع معاش
ايوه علشان كده العشر سنين اللي فاتوا كنت بحط مرتبي كله في البنك اهو ينفع العيال لما اطلع معاش
اه... وانت ولا مؤاخذة يا باشا هتطلع معاش امتى
شوف يا عوض يا ابني انا علشان ماشي مستقيم والوزارة عندي زي الالف تلاقي الحكومة ماسكة بيا قوي وكل ما المح اني عاوز ارتاح الاقيهم زعلوا مني.... يرضيك يزعلوا مني يا عوض
لا طبعا مايخلصنيش يا باشا وانت اصلا اساسا راجل نظيف ومنفض ومكبر دماغ قوي قوي... ربنا يخليك للمواطن والوطن يا نصير الغلابة... اروح انا بقى يا باشا
لا طبعا ودي معقولة تطلع من عندي منفض... لا انا لازم اديلك حاجة بس زي ما انت شايف انا لا املك شيء في القصر ده
يعني لو معاك كام ملطوش في جيبك انا منكن اعديها المرة دي واخد ناشف
خسارة اصلي مابحملش كاش موني ما انت عارف يا عوض انا وزير ومش معقولة امد ايدي في جيبي علشان احاسب
لا طبعا دي تبقى عيبه في حق الحكومة يا باشا... خلاش مش عاوز حاجة كفاية الشاي وعوضي على الله في الليلة
لالا ابدا لا ممكن... طيب اقولك انا اعشيك ايوه احنا ندخل المطبخ نشوفلنا لقمة ويبقى عيش وملح...
----------------------------------------------------------
ودخلنا المطبخ وعملنا عشوة مفتخرة والشهادة لله عبده الحرامي كان مبسوط مني قوي... وبعد ماخلصنا وجيه يمشي بصيت للمطبخ وافتكرت ام سيد دي لو شافت الحوسة دي كانت تطين عيشتي وتشكيني للداخلية ودي شكاكة ومش هتصدق اني كنت لوحدي ما انا ما اقدرش اقولهم كان معايا عبده الحرامي!
طيب يا عبده...
عوض يا باشا
ايوه طبعا... عوض بعد العشوة الجميلة دي ينفع نخرج ونسيب المطبخ بالشكل ده
لا طبعا يا باشا مايخلصنيش احنا نقسم الشغل انا انظف المواعين وانت ترجع كل حاجة مطرحها
وبدأنا ننظف واحنا اخر انبساط... اتنين رجالة سهرانين ومروشين - ده تعبير اقتبسته من عبده الحرامي ما احنا بقينا صحاب - وبعد ماخلصنا وصلت عبده للباب
طيب يا باشا اسيبك انا بقى ولو عوزت حاجة ابقى اسأل عليا في السيدة انت بس اسأل في اي قهوة على عبده منشار والف مين يدلك على مطرحي
ماشي يا عبده يا منشار هتوحشني يا راجل... بس... انا اصلي كنت محتاج منك خدمة ومكسوف منك
لا يا راجل مكسوف ايه ده احنا خوات وصحاب
اصل المدام والاولاد والشغالين يلزمهم يومين كمان عقبال ما يرجعوا ومافيش في البيت ولا مليم وانا زي ما انت عارف بحب التوست طازة مع المربى والعسل
اه ماشي... خد دول يا باشا خمساية كبيرة دي اللي احتكم عليها... الا قولي يا باشا سؤال زارر في زوري يعني
قول يا عبده اسأل
هو انت ولا مؤاخذة قبل الهيلمان ده كله كنت بتشتغل ايه وعايش فين
وده سؤال برضه يا عوض يعني لسه ماعرفتش... انا يا صاحبي وبكل فخر كنت بشتغل مواطن شريف من مصر!
تمت
