تحية تحية.. يام العيال
ايوه ايوه اني جايه اهو
هي رئيفة لسه مارجعتش؟
لا لسه. ماتقلقش تلاقيها هنا ولا هنا
وبعدين بقى اني مش عارف هاستحملها لحد امتى..
انت بتقول ايه ياراجل. انت نسيت دي يامه استحملتك
ايوه ماني عارف وده اللي مصبرني عليها... بس هي مزوداها حبتين دي طول النهار بره
ياراجل خليها تفك عن نفسها شويه
تفك عن نفسها في الغيط على الترعة مش كل شوية مع حد
هي بتروح عند مين يعني الواد مصلحي تربية ايدك برضه انت هتخاف عليها منه!
لا مهيه بقالها مدة مابتروحلوش هو شكالي منها
ايهه وانت تصدق عليها حاجة وحشة برضك
مقصوفة الرقبة بس لما اشوفها.. طول النهار من البيت ده للبيت ده اني هحش رجليها واعملهم شوربة
ياراجل تف من بقك دي بركتنا ولا اكمنها خلاص كبرت وماعدش منها الرجا يعني..
اني هادبحها دي وطت راسي في البلد وعاملالي مشاكل
ايوه طبعا عايز تخلص منها بعد ما اديتك كل حاجة.. دي يامه وكلتك وشبعت بطنك يامه بردت في الصيف علشان تدفيك بالشتا وبعد ده كله هتسمع شوية هجص وتقلب عليها!
بس اهل البلد كلوا وجهي ياوليه دي كل يوم عند واحد ورغايه مابتسكتش ثم هيه المفروض تقعد متستتة الشوية الفاضلين
متستتة تعمل ايه خلفة وماعدش فيها وعيالها وكل واحدة قاعدة في عشها وسط عيالها والمسكينة دي تعمل ايه طول النهار!
بس هي تأخرت قوي ولو بيتت بره الدار مش هيحصلكم طيب
ياحمدان زمنها جايه ما انت عارفها دي مابتبيتش بره الدار هاتلاقيها قدامك مع اذان المغرب
واني هاستناها للمغرب اني نازل اشوفها عند مصلحي...
ياحمدان ياحمدان
ايوه ياشيخ الغفر عاوز ايه
عاجبك اللي عملته رئيفة ياحمدان
رئيفة! عملت ايه
خشت دوار ابونا العمدة واستربعت على الكنبة وهو في اجتماع مع حفيظ بيه اصله كان بيتفق معاه على انه يأجر منه التركتاتور للانفار السنه دي بدل تركتاتور الجمعية اللي عطلان بقاله مدة.. تقوم تيجي رئيفة في حموتها لما اتفقوا على اليومية وتقول لابونا العمدة وفي وجه كواااااك!
ياحلاوة ياعيال يعني رئيفة قالت لابونا العمدة كوااااك!!
انت مبسوط ومنشكح على عملة وزتك.. طيب والله ما اني عاتقها الليلة اني دابحها يعني دابحها
ياتحية الحقي ياتحية هيدبحوا رئيفة ويعملوا عليها ملوخية!
