ليه تعمل كده بس... هي دي اخرتها معاك يا مصري... ايييييييييه قال افتكرلك ايه يا زمن... ده انا أصلي ومضروب تحت عين الحكومة ختمة شرعي ايشحال لو كنت مضروب تحت السكك اياهم كنت عملت فيا ايه!
ده انا فاكر اول مرة نزلت فيها السوق جيت في ايد الاسطى حسنين.. ياااه كان اسطى مجدع وايده كلها بركة اول ما شافني باسني وجه وظهر وفضلت في ايده معزز مكرم لحد ما اداني للمعلم حصيرة بتاع العيش اللي حطني في جيبه على مهل... يا سلام كانت ايام بركة بصحيح...
كنت في الزمن ده ليا قيمة واسمي ملعلط واتاقل بالدهب.. ده انا كنت اتفك بعشر برايز بحالهم وافضل بجيب العبد بالشهر والاتنين... كانوا ستة مني يدفعوا ايجار شقة تلات مطارح شهر بحاله... ده انا كنت اعمل حلة بامية لعشر تنفار ومش قرديحي ويحلو بصينية بسبوسة بالسمن البلدي كمان... كانت ايام...
ولفت بيا الدنيا ايد تشيلني وايد تحطني لحد ما وصلت للزمن الاغبر ده... قال ايه ماعدتش ليا قيمة... يوم العيد خرجني الاستاذ حنفي من جيبه وكان طاويني بعناية خاصة واداني لمراته حسنات اول ما شافتني شهقت.. افتكرت نفسي طشة ملوخية.. قال ايه انا يتعمل بيا ايه الزمن ده ده انا ماجيبش عيش حاف!
ياخراشي الوليه حتكدب قدامي ده انا لسه جايب كيس شيبسي حجم عائلي للواد المكلبز هيمه... ولانها صممت على موقفها فالاستاذ حنفي اكتفى بتقديمي عيدية لابنه كموله وكنت متفائل بيه الصراحة قولت خلاص هو ده ماهي العيال كلها كده عمري مانزلت في ايد عيل الا وخدني بالحضن... واول ما مسكني كموله راح باصصلي من فوق لتحت ونطرني في الهوا بقرف وراح قايل لابوه هو لسه في حد بيدي المدعوق ده عيدية!
ده انا كان هاين عليا اديه على وجهه واعلمه ازاي يعرف قيمة النعمة اللي في ايده لكن مالحقتش كرمشني في ايده واداني للي مابيرحمش... بدلني بيويو نص عمر من المفتري البلطجي ساقط ابتدائية سبع مرات الواد بشلة... هو مسكني من هنا وانا اتشهدت على روحي خلاص ماهو شكله سوابق ومايطمنش ولسه حاططني في ايده وراح مبتسم ابتسامة عبيطة والعيال اتلمت عليا وفردني على طولي قولت خلاص هيوديني جوانتانمو بقى... اتصفيت من الروووعب وانا مستني مصيري... اللي مايتسمى طواني مرتين لفوق ومرتين لتحت وعمل مني طيارة صغنونة... يا عبيط مش فلوس انا ولا ورقة صنفرة روح يا شيخ اشتري بيا بون بوني ولا ايس كريم... لا بلاش تولع بقولك... اااااه... ولع فيا المفتري بعد ما ركب في ديلي ماسورة حمرا وطلعت طيراااان...
وقبل ما يكمل شريط حياتي قدامي كنت نازل على جدور رقبتي... في نص الشارع... اخيرا استريحت على الاقل دلوقت يمر حد ويشلني ويجبس الشلفطة اللي في وجهي... يوه ايه ده الناس ماشية وبتعدي ولا حد معبرني خالص!
يا أخ.. انت يا محترم... انا اهو... يا ست يا مووودام... هو فيه ايه اكونش قلبت ربع جنيه اثناء الهبوط؟
وفجأة.. لالا بلاش انت ابوس ايدك... الكلب ابن الكلب قفشني.. ده بيشمني... يييييع... ايه الميه اللي نزلت عليا دي... لا لا بلاش اللسان لااااااااااا... النور طفا فجأة...
وطبعا فضلت في... بق الكلب ساعة حاطط ايدي على خدي ومستسلم لمصيري... ما هو المنطق بيقول انه مش هيروح بيا السوبر ماركت!
الحمد لله مافيش أسوأ من كده... وغالبا هتنتهي رحلتي في حفرة مع شوية عظم!
وانا غرقان في افكاري واذ طوق النجاة قدام عينيا... الراجل الكبارة انا شوفته فين قبل كده... مش مهم المهم هو ده اللي حينقذني اكيد مش حهون عليه... وفعلا زعق للكلب اللي خاف و... احم... خرجني من بقه بكل ادب وقرب مني الراجل الطيب اللي... ايه انت بتعمل ايه يا عم... ده مشي... لا ماتسيبنيش هنا لوحدي انا بخاف من الظلمة وخارج من بق كلب متشلفط يا ناس ارحموا عزيز قوم ذل!
وفي عز ازمتي ونوحي وبكايا جات فارة مقرفة وعدِت فوق وجهي ولا كأني ليا اي قيمة ماهو مش الحق عليها الحق على الـ... ايه ده يووووه تاني... وللأسف لقيت نفسي لزقت في ديلها ومفضلش زلط في الشارع الا وكل مني حتت ورقات... ولما انفصلت عن الديل اخيرا بقوة الاحتكاك كنت خلاص بقيت هفتان عدمان اسود من قرن الخروب وعلشان تكمل خبطتني نسمة هوا في ظهري وفضلت تشيلني وتحطني لحد ما رمتني في الترعة... ايهئ ايهئ كنت فاكرها ترعة لحد ما شميت الروايح البحري دي... وضاعت معالمي خالص وخلاص مافيش حد هيعرف قيمتي بعد كده.... واه يا زمن ياترى هفضل في جيبك يا مصري ولا هينتهي زماني زي ما انتهى زمن المليم!
وااااعجبي
