وحشتوني كلكم. من زمان ما عبرتش عن ذات مكنونات نفسويتي وكتبت حاجة... من ايام قعدة ستات الطاولة المستربعة... اييييييه كانت ايام، بحلوها ومرها جميلة ووحشوني البنات وحواديدتهم وقرهم ع الرجالة.. احم اقصد حديثهم عن بطولات ازواجهم والفسح والحياة البمبي والكلام الفاضي اللي من النوع ده... ما علينا ما علينا خلينا في المهم..
انتم طبعا فاكرين اهل حتتي حبايبي الست ام فاروق وجمالات وام حفيظة وام فتحي وام توتو وحتى مقصوفة الرقبة عطيات ومقالبها البايخة
اه بقالي مدة منقطعة عن جمعتهم وحواديتهم والسبب الست ام نوسة اللي سببتلي الروماتيزم والزوهايمر والجفاف بعد اللف اللي لفيته معاها على عروسة المحروس ابنها لحد ما جالي شلل اطفال! ده انا شفت فيكي محافظات ومطارح يا مصر اشك انها موجودة على الخريطة ده لو كعب داير كان ارحم سامعاك ياللي هناك وبتقول بتبالغ طيب انا اقول اللي حصل وانا راضية ذمتكم...
(1)
"عينيها خضرة وشعرها اصفر"
اصطبحت يوم جمعة اجازة بقى عقبال امالتكم ونفسويتي جايباني على حلة كاكاووو اصحصح بيها - والساعة يادوووب تمانية - ابتسامة عريضة وانا داخلة المطبخ وبهش النوم عن عونيا ومستمتعة بصوت زقزقة العصافير واذ صوت شبه البلدوزر جاي من ناحية البلكونة...
- ام تفيييييييييييدة... يام طفطف... يا تفتوووووفة
- تفتوفة!!! هي حصلت؟؟ مين الوليه القراشانة اللي بدلعني بالوان التفتف ع الصبح!
وجرررري ع البلكونة ابص لتحت شفت ام نوسة على سنجة عشتاشر لابسة جلابية العيد وزارعة في عنينها كرومب ودستة غوايش في كل دراع خلتها شبه عروسة المولد وبابتسامة كلها عذوووبة كشفت صف اللولي الاصفر اللي في بقها بصتلي بدلع وقالتلي:
- معاكي تلات دقايق يام تفيدة تحطي جلابيتك وتنزليلي ماذا والا اسيحلك في الحتة واقول مواعيدك فشنك
- هو انتِ لسه هتسيحيلي يا وليه ايه ده ثم هو موعدنا مش كان السبت انتِ نسيتي
- لا ياختي مانسيتشِ الجماعة كلموني ع المحمول امبارح وقالوا تعالوا النهاردة
- الامر لله كانت شورة مهببه يوم ما استجدعت وقولتلك اجي معاكي انا عارفة مش هيجي من ورا المشاوير دي الا وجع القلب وقلبة الدماغ
- بتبرطمي بتقولي ايه يام تفيدة انتِ لسه واقفة عندك
- حالاااااااا نازله حالااااااااا
نزلنا ويادوب الساعة ماجتش تسعة وانا مدايقة الصراحة اصلها بدري قوي وعيب ندخل ع الجماعة بدري كده خصوصا يوم جمعة
- انتِ متأكدة يام نوسة ان الجماعة ادولك المعاد ع الصبح بدري كده
- معاد ايه يام طفطف هي الحاجات دي فيها معاد.. احنا اتفقنا معاهم يووووم الجمعة
- ومادام يوووم الجمعة ليه طالعين بدري قوي قوي كده
- يا نصيبتي هو انتِ مش عارفه احنا رايحين بدري ليه
- عارفه بس مكدبة نفسي
- لا ما تكديبهاش هو كده
- الحاجات دي بطلت من زمان يام نوسة من ايام الخاطبة والبيشة وماري منيب والابيض والاسود ايام ما كانت النسوان تطب على بيت العروسة الفجرية زي القضا المستعجل علشان يشوفوها من غير زواق وعلى الطبيعة وياخدوا معاهم شوية بندق بقشرها علشان يستأكدوا ان سنان العروسة أصل مش طقم عيره
- طبعا هي دي الاصول اومال هاعرف ازاي ان العروسة حلوة ونغشة وبتصحى من النوم شبه الملايكة وللا كئيبة وبتصحى بشلوت وتقوم شبه شرفنطح.. ياختي ده زمان قالوها حكمة الحلو حلو ولو قام من النوم
- واحنا لازم نطبق الامثال دي بحذافيرها!!
- اسمعي يام تفيدة تبصي لام العروسة كويس تفليها من راسها لساسها فاهماني
- ليه واحنا هنجوز الواد لام العروسة
- يام تفيدة اتنصحي شوية الواد تلتينه لخاله يعني لو ام العروسة حلوة العيال تطلع حلوة والنظافة اهم حاجة النظافة اصلها لو نظيفة بنتها تطلع زيها ولو عفشة ولا مؤاخذة البت تطلع لمين
- لميييين؟
- ام تفيدة ركزي معايا يا وليه
- مركزة طبعا انا اركز مع ام العروسة لا احود يمين ولا شمال
ومشينا.. هريتني مشي الوليه وانا اقولها نركب تكسي وهي تبتسم ابتسامتها الرقيقة وتقولي:
- اهي انتِ عجزتِ يام طفطف وللا ايه
وصلنا العمارة والحمد لله الجماعة شقتهم في الطابق التاني واحنا طالعين الوصايا العشرة بقى:
- ما تنسيش يام طفطف تعملي نفسك عاوزة تروحي الحمام وابقي تفقديه كويس
- يا وليه اهمدي حتى الحمام ماسلمش منك
- قوليلي انتِ يا ناصحة نعرف نظافة البيت ازاي
- يا رب ارحمني
وصلنا باب الشقة ام نوسة حطيت صوباعها ع الجرس ودوس يا معلم لحد العمارة كلها ما فزعت على صوت الجرس.. وخرج صاحب البيت بالبيجاما الكستور فاكر ده الزبال لانه كان شايل كيس الزبالة ونطره في وشنا اول ما فتح الباب وباين اتصدم اما شاف اتنين ستات لابسين اللي ع الحبل وواقفين بابتسامة عريضة في وشه ع الريق كده وقبل ما يفوق من الصدمة كانت ام نوسة دخلت الشقة وانا في ريحها على طووول وقدمتنا للراجل
- احنا اللي كلمتونا امبارح علشان العروسة
الراجل لازال على انصدامه وقال وهو بيبص في ساعته:
- اهـ اهلا اتفضلوا في الصالون
وخد بعضه وخرج من الاوضة وهو بيتلفت وراه.. شوية ودخلت علينا ام العروسة وعلى وشها نفس نظرة الانصدام واعتذرت بأدب على التأخير سألتنا تشربوا ايه ام نوسة قالتلها كلمة واحدة:
- العروسة
خرجت ام العروسة وغابت عن الانظار... ربع ساعة تقريبا... وام نوسة طبعا اشتغلت تقلب بعنيها العفش والحيطان...
شويه ودخلت العروسة وكانت زي القمر وحسيت ان ام نوسة قفشت فجأة مالت عليا واتنحنحت:
- لا ياختي يام تفيدة دي لا منكن انتي عاوزه توكسينا
- واوكسك ليه ياوليه
- انتي مش واخدة بالك من العروسة عنيها خضرة ازاي دي طرطوفة نظرة تجيب الفاموليا كلها الارض
- يا سلام ومين قال ان العين الخضرة بتحسد ما انا اهو قدامك وعنيا خضرة وبقالنا جيران والباب في الباب من قرن عمري حسدتكم في حاجة!
- ياخراشي تصدقي ياختي عمري ماخدت بالي.. وانا اقول الزرع اللي كان مالي الجونينة تاني يوم ما شربتي معايا القهوة في البلكونه صبح كله مصفر وكانه ادلق عليه جاز يا ساتر يا رب
- انتي بتبرطمي بايه
- لا مافيش
وطبعا استأذنا الجماعة بالجملة الشهيرة كل شيء قسمة ونصيب وربنا يجعللنا نصيب عندكم الخ الخ...
وفي هذه المواقف عادة اهل العروسة بيستنوا تلفون من ام العريس وبعد يومين لا حس ولا خبر تفهم ام العروسة ان الجماعة صرفوا نظر...
وطبعا مافيش داعي اقولكم ان ام نوسة... صرفت نظر.
يتبــــــــــــع....
"مجلس الخاطبة ام مصلحي"
