من مده كده شوفت برنامج في التلفزيون بيتكلم عن الشام والحلويات الشعبية بتاعت الشام، وبصراحة عجبني البرنامج قوي وعجبني اكتر النظافة والشغل الجامد اللي هم بيعملوه في مجال الحلو. وفكرت اتطقس واحاول ادعبس في السوق وقررت اطلع اللي تحت البلاطة واعمل مشروع معمل ومحل حلويات شامية هنا في البلد... كلمت اخونا بتاع البرنامج عن الفكرة وربنا يجبر خاطره ساعدني واداني شوية تلفونات وعناوين لناس في الشام بتشتغل في الكار ده. وطبعا كنت محتاج شريك في الموضوع فحطيت خطة وخرطت الناس اللي اتكلمت معاهم نفر نفر لحد مااستبيت على واحد واخد الكار ابا عن جد اسمه المعلم شفيق. واتفقنا اننا ازوره في الشام علشان اتنور......
يااهلا وسهلا شرفتينا والله انت وكل اهل مصر نورتوا الشام
منورة باهلها يامعلم
قوليلي كيف شوفتي الشام العتيقة. وعجبتك دمشق؟
ايوه طبعا دي حاجة احلى من التلفزيون خالص
طيب نحن راح نروح على بيتي هلأ علشان نتغدى وبعدين بنتفق على الشغل، شو قلتي
بس مش عايز اتعبك يا معلم
لالا المدام بتكون ناطرتنا على الغدا من زمان مو حلوه.
طيب
...............
يا نور الدين قول لإمك عنا ضيوف
ياهلا ياهلا، والله شرفتينا ياست إم تفيده. شو بتحبي تشربي؟
شو تشرب وماتشرب حضري السفرة خوخنا من الجوع
ياراجل بالراحة عليها
اتفضلي على الغدا.......
وطبعا مااوصفلكمش السفرة اللي قعدت قدامها اشي محمر واشي مشمر ومحشي وكل اكلة اسمها اعجب من التاني. والست ميسر ماقعدش وطول القعده وهي بتغرف وبترص قدامي، وشويه كده لاقيتها حطيت قدامي طبق فيه لبن وحاجات تانية وقالت: اتفضلي ياست إم تفيدة دوقي الباشا وعساكره وقوليلي رأيك...
يانهار مطين، ليه مافضلش غير البني ادميين علشان اكلهم. بصيت في الطبق وقلبته بالمعلقة بدور على الباشا والعساكر اللي معاه... وقلت اغير الموضوع بلاش ادبس بالطبق وسألت المعلم شفيق عن العماله الشامية لو كنت عايز اجيب اسطى حلويات شامية.
ايه بنحكي في الموضوع على البحره. يابنت ياميسر اشقحيلنا بطيخة على البحره
حاضر ابن عمي
بصراحة انا اتفرست من الراجل، كل شويه ينده الست مراته ومشغلها بواباتي وسفرجي وهي ياعيني بتلف على رجليها من الصبح. قلت اكلمه يخف شويه... ولسه ماكملتش جملة مفيده راح متنرفز عليه وباصصلي زي مااكون عملت عمله وقالي:
ياست إم تفيدة المرا الله خلقها لخدمة الرجال. يعني انا موجايب شي من عندي
بس يامعلم دي شقيانه طول النهار والمساعده حلوة برضه
شو بدك اياني اكنس وامسح واطبخ بدالها!! نحن الرجال ربينا هيك، نحن بنتعب وبنشقى برة البيت وهن الحريم بيتعبوا جوه البيت. ولا شو؟
ولاشو ايوه ايوه... ده كان فارسني بس خفت اقوله لا يقوم يفرمني ويعمل مني بسطرمه...
طيب خلينا في الشغل. انا راح ابعت معك واحد من صبياني معلم كنافة وبقلاوة ترباية ايدي. وبيمسك المعمل والمحل بعد مابيدربله كم واحد يشتغلوا تحت ايده
نعم يا روح امك، يمسك المعمل والمحل وانا هبقى ايه رجل كرسي
انت الاصل ياست إم تفيدة، بس نحن ماعنا نسوان تقعد في المحلات. وشو بيدك بوجع هالراس انت اقعدي في بيتك معززه مكرمه والمصاري بتوصل لحد عندك كل اول شهر. وهاي راح نحط كل المعاملات الرسمية باسمك
يافرحتي... صحيح حمش حبتين زياده بس بصراحة احسن من العيال الخرعة بتاعة اليومين دول كل همهم الفسح والواكس ويبقى الواحد منهم شكله كده فقعت فيه الكهربا.. حاجة تكسف.
وكانت هيصه بعد مارجعت مصر لفيت انا والمحامي كعب داير لحد ماطلعنا الرخص واستكملنا الاوراق المطلوبة كلها. واقول الحق الامور كانت ميسرة ومافيش احسن من كده ومافضلش بقى غير رخص استيراد المكن.. اصل المعلم شفيق اتفق معايا انه يبعتلي مكن للمعمل صناعة سورية بتعمل كافة شئ بتعجن وتقطع وترص حاجة كده ماشوفتهاش قبل كده. والمكن كويس ورخيص وقطع غياره قريبة. قلت للمتر يروح الوزارة علشان استيراد المكن، وبعد يومين كلمني وقالي انه ماتوافقش عليه... اتاري الوزارة قال ايه ماعندهاش اتفاقية استيراد مكن للتصنيع من سورية، واذا كنا عايزين نجيب مكن يبقى لازم من روسيا او الصين!
حاجة تقرف، اذا كان المكن ده براءة اختراع سوري اجيبه انا ازاي من روسيا او الصين ايه هصنع زلط ونودلز.. دي بقلاوة وكنافة يا ناس مش مهلبية.. مافيش روسي ومافيش صيني خلاص فركش ياحكومة وخلي فلوسي تحت البلاطه مدفياني!
