"خناقات زوجية عادية جــــــــدا"

(1)
"انا هاجوزه واخلص منه"

 

ستووووووووب... كفاية كده جوزيه واخلصي منه!
دي كانت الكلمة العاقلة الوحيدة اللي اتقالت في البيت ده من خمس شهور...ماهو لما الست توصل للمرحلة دي يبقى الحل الوحيد هو زي ماقولت..ايوه بالظبط كده تجوزي جوزك وتخلصي منه!
الحكاية كلها ابتدت من حوالي خمس شهور..اي بعد طلوع السيد الوالد على المعاش..لكن يمكن القول انه ابعاد المشكلة دي بدأت تتبلور قبل اكتر من سنتين اي بعد دخول السيد الوالد في مراهقة الستين..احم.. ايوه الرجالة بتراهق برضه في السن الحرجة دي
المهم من حوالي يومين كده ابتدت نار الحرب تتأجج في البيت ده وتحول البيت الهادئ الى ثكنة عسكرية وانقسم سكان البيت الى معسكرين
معسكر الاغلبية الساحقة واللي همه طبعا الابناء الخمسة وامهم واطلقوا على انفسهم لقب كتلة الشمال
ومعسكر الاقلية المسحوقة واللي هي بابا العزيز طبعا و... لا ده كان لوحده اصلي انا انضميت لجبهة عدم الانحياز وسيبته يجابه الاغلبية لوحده.. سمعتك بس ماتقولش ندالة انت شايفني عبيطه علشان اخش في جبهة ضد كتلة الدبابير دول رغم تعاطفي طبعا مع المسحوق بابا
ومن باب العشم والعشرة حاولت اصلح الطرفين في اكثر من مناسبة ولكن على الفاضي... طيب نبتدي الحدوتة من الاول خالص

في يوم رجعت البيت من الشغل ولسه بفتح الباب واذ كرسي طاير خبط جنب مني ولزق في الحيط.. والعبيط حمادة شايل اخوه اللي اعبط منه توتو وهاتك يا هتاف... "فليسقط الاستعمار..يسقط يسقط".. "تيت تيت يامقهورين.. احنا وماما منصورين"..."على واحدة ونص على واحدة ونص وماما البوص وماما البوص"..."لا للقهر لا للاستغلال فلتسقط الامبريالية فليسقط الاضطهاد"

-انت ياض ياخلل مش لما تعرف معنى الامبريالية الاول تبقى تهتفلها..انزل من على كتاف اخوك
-لا مش نازل ولتحيا الديمقراطية
-ديمقراطية مين..فينك يا حاجة تعالي شوفي خلفتك اللي تشرح
-فيه ايه يا هدى انت جيتي
-يوه جاتك ايه يا ام حمادة لا انا لسه في الشغل.. طبعا جيت وبصور الهبل اللي عيالك فيه
-سيبيهم يا هدى يفكوا عن نفسهم يعني مش كفاية ابوهم
-طبعا لما الست الحاجة تقول ابوهم يعني حتفتح على الرابع وتبتدي نتف في فروة اللي خلفنا
-يا امي بلاش تشجعي عيالك على ابوهم دول ما صدقوا
-همه مش محتاجين تشجيع مني ده طلع عينيهم وبقوا يمشوا يكلموا نفسهم
-مين جوز النسانيس دول.. ده بابايا جنبهم ملاك
-ملاك ده هو اس البلاوي اللي في البيت ده.. خلاص انا ماعدتش طايقة العيشة معاه..خدني يارب
-لا اله الا الله ليه كده بس تعالي تعالي نخش المطبخ

ودخلتها المطبخ ودمعتها حتفر من عينها طبطبت على كتفها وقولتلها..فضفضي ياختي قولي اللي في نفسك...
طبعا ممكن حد يقول وليه الغلب ده بس سيبيها تهدى لوحدها..بص بقى يا باشا الستات دي بتعبر عن مشاعرها بالكلام ولو ماتكلمتش يحصلها كبت عاطفي قد يؤدي الى تدهور في النفساوية ..بينتهي غالبا بانفجار مواسير الصبر بالظبط كده..
وبدأت الست عقيلة الكلام وفي عينها دمعة حايرة تبحث عن فسحة امل خارج الظلام...

.............................................
(2)
"خناقXخناق"

 

 

البيت كله نايم بعد يوم اجازة حافل... ساعة الصالون تدق لتعلن الثانية بعد منتصف الليل... وفجأة صوت خروشة مصدرها مدخل البيت تحول بعد دقايق لصوت طرقات خفيفة على الباب
-عقيلة يا عقيلة قومي شوفي مين بيخبط على الباب
-انت تجننت يا راجل سامع الخبط وعاوزني اقوم اشوف مين
-من العين السحرية يا عقيلة مش لازم تفتحي يعني عاجبك الخبط ده قومي قبل العيال ما تصحى جايز حد من الجيران عاوز حاجة
-يا سلام وماتقومش انت ليه
-ما انت عارفاني يا عقيلة لو قومت مش هاعرف انام تاني..قومي بقى بلاش كسل
-كسل! هي حصلت طيب والله ما انا قايمة
-يا ولية قومي بلاش دلع العمارة هتصحى على صوت الخبط
-ان شا الله تولع حتى مش قايمة
-اشششش سامعة...الصوت اختفى
-اه صحيح...
لحظات صمت وكان الصوت اختفى تماما...
ليحل مكانه صوت سمفونية شخير منتظم صادرة من السيد عبد الصمد وهو غرقان بسابع نوومة...

تاني يوم الصبح الست عقيلة في المطبخ بتحضر الفطار للعيال...دخل عليها الاستاذ عبد الصمد وزعابيب امشير بترعد فوق دماغه
-يعني يصح اللي انت عملتيه ليلة امبارح ده افرضي كانت حالة طارئة وانت مافتحتيش
-يا راجل اصطبح الاول ثم مش انت راجل البيت مش كان المفروض تقوم انت
-لا مش المفروض كان كفاية تقومي تبصي من العين السحرية ولو حاجة ضروري اقوم على طول
-يا راجل حرام عليك اللي انت بتعمله بيا ده
-اللي انا بعمله مش انتم عاوزين كده هلكتونا في التلفزيون والراديو وسممتو ودانا بالكلام الفاضي عن المساواة وحقوق المرأة ولما نسمع الكلام ونيجي نديكم المساواة تقولولنا شطبنا مش عاوزين النهاردة... فعلا نسوان تاكل وتنكر شوفي انا مستتك ومهنيك ازاي روحي شوفي نسوان تانية عاملة ايه يعني هو انا طالب منك ايه ده بدل ما تقولي الراجل شقيان طول النهار اسيبه يستريح شويه
-نعم نعم شقيان ده ايه وبتاع ايه هو انت مش خرجت معاش يا روح امك وطول النهار قاعد على القهوة
-اه لا طبعا دول كلهم شويه الظهر وتنتوفة المغربية ثم انت هاتحسديني على شوية القعاد على القهوة هو انا اللي كنت قولت للحكومة تخرجني معاش
-اشوف فيكم يوم انت والحكومة في يوم واحد قادر يا كريم تسونامي في ليلة باردة يا رب يشيلهم واخلص
-اللي يسمعك يصدق ويقول يا حرام مظلومة قوي اصله مسكين مايعرفش ان انت تظلمي بلد بحالها
-اخرج من المطبخ يا عبد الصمد قبل ما الجنونة تخرج واصورلكم قتيل النهاردة
-اعتبر ده تهديد يا عقيلة
(وقبل ما تبتدي الست عقيلة موشح اندلسي من العيار الثقيل دخل الواد حمادة ننوس عين امه وطلب منها فطاره ويا سبحان الله انقلبت عقيلة لحمل وديع وهي بتكلم ابنها ولا عبرت الراجل اللي فتح بقه علامة التعجب لقدرة النساء على التحول من قمة الغضب لقمة الوداعة في ثانية لدرجة انه الراجل وقف على جنب يتأمل ويتفكر ياترى الستات بتعمل كده ازاي يكونش في سويتش سحري على جنب؟؟؟)

.............................................
(3)
"ظلموه"

 

 

-ده انا بقالي تلاتين سنة مستحملاه وشايلاه بخيره وشره الا ما اشتكيت ولا بكيت استحملت فقره وقلة حيلته
-وهتستحمليه التلاتين سنة اللي جايين ان شاء الله
-ده خدني لحم وخلاص هيرميني عظم بعدما فنيت عمري وصحتي في خدمته هو وعياله
-معلش يا امي كله اجر ان شاء الله
-صاينه العشرة وبقول يابت اصبري علشان العيال
-بكره ربنا يعوضك عوض الصابرين ويفتح عليك من وسع
-يا حسرة بعدما شاب وطلع معاش هيلاقي مصباح علاء الدين مثلا
-مثلا
-يابت انت بتاخديني على قد عقلي
-يا عقيلة ده ربنا كبير وقادر على كل شيء
-انا تعبت وماعدتش مستحملة خلاص انا فاض بيا لا ليا ام تطبطب عليا ولا اب ياخدلي حقي منه ويشكمه
-انا اشكمهولك واخليه يراضيك بس انت ابتسم يا جميل
-بطلي بكش يا هدى خلاص ماعدتش يجي منه انا اتخذت قراري وخلاص رايحة اقعد عند اخويا في طنطا ارحملي من القعاد مع ابوك
-يالهوي تروحي لخالي في طنطا
-وفيها ايه انا اخته شقيقته وهو مجبور بيا
-ده عنده دستة ونص يا امي واتنين نسوان وكلهم قاعدين في اوضتين وصالة وعفشة ميه
-وماله يستحملوني برضه وانا متأكده انهم هيشيلوني في عنيهم
-طبعا اصل مافيش حتة تانية فاضية يقعدوك بيها
-انت بتقفليها في وجهي يا بنت عبد الصمد
-وماله عبد الصمد يا عقيلة ده برضه سترك وغطاك والحيطة اللي بتميلي عليها في الايام السودة
-ولو انا مش هتراجع
-طيب والعيال دول لسه صغيرين ومحتاجين امهم واوعي تقولي اخدهم معايا ده كان خالي ومرتاته يطفشوا من البيت ويسيبولك عيالهم فوق جوز النسانيس ولادك
-مش هتنازل يعني مش هتنازل وكفايه كده
-هو كان عمل ايه لده كله يا امي
-بقى يحشر مناخيره في كل حاجة ويلف ورايا زي العيل الصغير طول النهار اغيب شويه يقلب عليا الدنيا حاسة انه بيراقبني وقاعدلي على الواحدة ده بيعد عليا رشة الملح في الطبيخ
-يا امي هو معذور برضه ومش متعود على قعدة البيت وكل الرجالة اما بتكبر بتعمل كده
-مش بالشكل ده انا اتخنقت وزهقت ومرارتي فقعت منه خلاص
(وطبعا بعد فشل المساعي الدبلوماسية كان لابد من تدخل قوات صديقة كاخر محاولة قبل اعلان حالة التمرد.. وبتدخل محمود اكبر الابناء اتفق الطرفان على عقد مؤتمر للمفاوضات في مقر العائلة الدائم اي في المطبخ في ساعته وتاريخه وكان حاضرا مع الست عقيلة كل من حمادة وتوتو وسندس اما على الطرف المقابل فكان حاضرا مع السيد عبد الصمد كل من ابنه البكري محمود ومراته هبه وسي قشطة قط العيلة المدلل... انا مع عدم الانحياز في اخر الطاولة بكتب محضر الاجتماع الذي كان هيولع حريقة لولا الاتفاق الغريب الذي اتفق عليه الطرفان...)

.............................................
(4)
"معاهدة ورق التوت الاولى"

 

-بسم الله وعلى بركة الله نبتدي جلستنا .. ايوه يا ست عقيلة طلباتك
-انا ماليش طلبات مش عاوزة منك حاجة غير تعتقني وتسيبني اروح اقعد عند اخويا
-اعقلي يا عقيلة اخوك في رقابته كوم لحم وكفاية عليه جوز النسوان اللي عنده مش هتكوني انت والزمن
-بس انا مش عاوزه اقعد معاك خلاص انا استحملت كفايه ومن حقي اخد اجازة
-امممم اجازة كده حلو يبقى فيه حاجة نتفاوض عليها ايه رأيك اخدك شرم يومين
-انت عاوز تجنني يا راجل انت وارجع بعد الاجازة وكأنك يابو زيد ماغزيت
-يا ماما شوفي حل تاني غير انك تسيبي البيت
-ايوه يا ماما ان شا الله حتى تقولي اسيبلك اوضتي هاسيبها
-خليها هدنة يا عقيلة وبلاش تهور
-ايوه يا ماما والمثل بيقول شيل ده من ده يرتاح ده عن ده
وهنا لمعت عيون عقيلة وارتسمت على وجهها ابتسامة غريبة اعتدلت في جلستها وقالت
-طيب انا موافقة افضل في البيت بشرط
-اشرطي يا عقيلة لما نشوف اخرة الدلع ده ايه
-نبني حيطة
-حيطة!
-الشقة  تنظيم قديم لو عملنا حيطة في نص الصالة يبقى عندنا شقتين نظام جديد كل واحد اوضتين وصالة صغيرة بمنافعهم
-نعم يا روح امك تبني حيطة في شقتي ايه هو جدار عازل ثم الشقة خمس اوض مش اربعة انا بدي اعرف دلوقت الاوضة الخامسة راحت فين
-دي هاخدها لتوتو علشان يعرف يذاكر انت ناسي انه ثانوية عامة ولا بتتلكك علشان مايجبش مجموع
-اللهم طولك يا روح والمطبخ طيب
-ده هيعتبر منطقة حدودية منزوعة السلاح
-سلاح هي حرب يا عقيلة
-ايوه يا عبد الصمد وبيني وبينك هيئة الامم واوعى تفكر تلاوع او تتحايل كله بالقانون
-يالهوي مراتي اصيبت بلوثة يا جدعان  الحقوا امكم يا ولاد لسعت
-اتريق زي ما انت عايز انا مش هتنازل عن شبر واحد من منطقتي ومعتكفة في اوضة هدى لغاية ما ربنا يهديك وتنفذ القرارات المتفق عليها معاك مهلة 24 ساعة يا عبد الصمد
-انا ما بتهددش يا عقيلة ولا يمكن امشي ورا جنانك ده علشان ارضيك ومش هانفذ حاجة
-براحتك يا عبد الصمد يا توتي ولكن لا تلومن الا نفسك وقد اعذر من انذر
وبعد مغادرة الست ماما لطاولة المفاوضات مشيعة بعيالها جلس بابا يفكر تفكيرا عميقا وعينه بترف بعصبية وهو غير مصدق لما حدث وانا قاعدة معاه طبعا بفكر بعمق برضه وبتساءل ياترى عقيلة هتدخلني الاوضة معاها ولا اعسكر في منطقة محايدة الليلة وامري الى الله في انتظار ما ستسفر عنه بقية المفاوضات

.............................................
(5)
"كل يغني على ليلاه"

 

 

احنا وصلنا فين المرة اللي فاتت ايوه افتكرت السيد بابا اصيب بصدمة عاطفية من الدرجة التانية بعد انفجار مواسير المفاوضات واصرار عقيلة هانم على الانفصال بالشطر البحري من البيت ليظل هو وحيدا يغني على الاطلال يقف على حيطة الشطر القبلي ويغني توبة ان كنت اتجوز تاني توبة!
ده اللي كان في خيالي وانا بحاول اتلمس طريقي زاحفا من تحت الانقاض اقصد السرير واخرج من الاوضة بهدوء شديد لاحسن عقيلة تصحى وانا معدية من الصالة باتجاه الحمام حاجة بسبستلي
-يا هدى هدى تعالي هنا
-بابا! انت فين
-هنا تحت
-تحت فين
-هنا تحت الكنبة تعالي
-بتعمل ايه عندك يا حاج!
-اشششش انا عاوز اكلمك على انفراد
-انفراد!!
-ايشششش ايوه
-ماشي بس احنا مستخبيين هنا ليه
-علشان جواسيس العدو ماتلمحناش
-جواسيس تقصد مين
-هما في غيرهم توم وجيري
-توم وجيري يبقوا حمادة وتوتو طيب والعدو لالا يا بابا اوعى تكون تقصد
-ايوه واحنا مش هنذكر اسمها في الحوار ده خالص
-ماشي يا عم براحتك كلي اذان صاغية
-تعرفي يا هدى انا طول عمري اقول عليك اعقل ولادي وحقانية لا يمكن تنصري الشر -على الخير ابدا جدعة كده وبنت بلد
-انا مش مستريحة يا حاج الحوار ده رايح على فين بالضبط
-الا انت تعتقدي بان ع ممكن تنفذ تهديدها وتبني الحيطة بالقوة
-والله يا حاج من خبرتي الطويلة مع ع اعتقد بانها بتتكلم من منطق قوة وماكنتش بتهزر الظاهر مسنودة
-ااااه مسنودة طبعا ماهي كل ما كنا نتخانق تهددني بابن خالتها مكرم باشا سيادة اللوا اللي كان متيم بيها وانا لطشتها منه اهئ اهئ اهئ
-ايه لطشتها دي يا عبده مش مناسبة خالص في الحوار الحربي ده
-احم معاك حق يا كابتن احنا لازم نحافظ على رباطة جأشنا لكسب المعركة
-نركز بقى انا ممكن اساعدك لكن بشرط
-اشرط يا كابتن هي هتوصل لعندك وتقشف واوعدك لو خرجت من الورطة دي اعينك حليف استراتيجي
-لا ماهو ده الشرط اسمي ما يظهرش ابدا في المستندات الرسمية ولا غير الرسمية وماتنساش انا مع عدم الانحياز مفهوم
-طبعا طبعا الشغل كله من تحت الطاولة
-ودلوقت نفرد اوراقنا وندرس خياراتنا العسكرية ضد كتلة الدبابير هل معاك اوراق ضغط
-معايا ورقة بخمسين تنفع
-ورقة بخمسين! ركز معايا اوراق للضغط على العدو
-ايوه طبعا احنا ممكن نلجأ للتهديد والضرب من فوق الحزام واطلق ع ونخلص
-انت كده هتضيع نفسك وتصفى في الشارع ان شاء الله انت ناسي انه الشقة من حق الزوجة ودي لسه حاضنة اي نعم جوز النسانيس شحوطة عرض الحيط لكن القانون قانون
-اي والله نسيت الحكاية دي طيب ايه رأيك اجيب قرايبنا من البلد عمتك شلبية وجوزها سعدان وولادهم السبعة يقعدوا معانا
-اممم اسلوب التطفيش فكرة جنان مشكلة صغيرة
-ايه
-فاكر اخر مرة عملتها عمتي وجات عندنا يا عوبد انتهت الليلة بانه ع بلغت البوليس انك مأجر الشقة من الباطن وبيت على البورش لحد ع ماخرجتك بكفالة
-ماتفكرنيش دي كانت ليلة غم امك قادرة وانا غلبت معاها لازملنا خطة محكنة للقضاء على الدبابير
-وهنا اطرق بابا مفكرا لحظات ثم ابتسم وهو يقول
-يوريكا!!

.............................................
(6)
"بديعة كفتة"

-اصطبحنا وصبح الملك لله ومين بات مظلوم ينصره ربه عللي عداه الفول هيبرد يا عبودي قوم يا راجل عصافير بطني بتجعر!
ايه وابور الزلط اللي معدي وسط بيتنا ده المنظر في الصالة كان حالة عجيبة ست طول بعرض بارتفاع فارشة الارض ومشمره للكوع وفي كل ايد صف غوايش دهب مغطي اللحم للكتف وعليها طرحة بالوان شبه كرنفالات البرازيل وفي ايدها فحل بصل قد دكر بط بلدي ده غير الفول والجرجير والطعمية والعيش السخن بصراحة الروايح كانت مغريه جدا خرج بابا من اوضته نافخ صدره زي الغضنفر واستربع جنب الست على الارض اللي ابتدت تزغطه وهو منشكح على الاخر
-تعالا يا عدوله وهات مراتك يلا يا حمادة الفطار سخن اصحي يا سندس
-انا اول مرة اشوف الحاجات دي في بيتنا
-ده فطار ملوكي يا غشيم للناس الهاي بس تعالا
-ايه الفطار البيئة ده فين الكروسان بتاعي
خرجت عقيلة ووقفت في وسط الصالة وهي بتفرك عنيها مش مصدقة اللي بيحصل قدامها قبل ان تصاب بنوبة عصبية وتشبط في رقبة بابا لتفريغها
في بيتي يا عبد الصمد... وقدام العيال... والاشكال دي انا هاشرحك واشرحها وافرم لحمكم وارميه لبيييب السكك
-تشرحي مين يا روح امك هي سايبة ده انا اقطعك انت وعيالك واعبيكم في علب بسطرمة واختم عليها تاريخ منتهي الصلاحية عليهم يا عوبد
-عليهم يا عيال
وخلال دقايق قامت معركة طاحنة في البيت زحف عوبد متسترا بغطا حله وقدر يوصل لبير السلم وطلب تدخل قوات حليفة من الجيران وجريت ام حسن وام هاني والانسة مها من الدور الخامس وام لطفي والحاج عوكل من الدور السادس اضافة الى الخاطبة ام حلاوتهم والداية ام شحتة من العمارة اللي ورانا وكله بيجري ويصوت ويضرب في المليان وكأنهم ماصدقوا وينصروا عبد الصمد التوتي على المدعوة ع وعيالها!
وكانت كفة المعركة راجحة لصالح بديعة كفتة وقواتها وفجأة وصلت امدادات الكي جي ون والكي جي تو باستدعاء من مجهول وانتشرت كالجراد تشعلقت على الاعناق لوضع الزيتون في الودان وتكلبشت في الروكب وفين يوجعك واعاقة حركة العدو وتمت هزيمة قوات بديعة كفته مودعة بزفة تواصي لفلول المنهزمين على ايدين عيال كي جي ون على السلالم!
وانتهت المعركة بوصول البوكس وعساكره اللي لموا الاخضر واليابس وزفوهم برضه على انغام السرينة لحد القسم وتم نقل المصابين والجرحى الى المستشفى وسط استغراب شديد لاختفاء اي اثر لبديعة كفته بعد حصر خسائر الطرفين وكأنها تبخرت في الهواء
وقفلت الليلة بمحضر صلح خرج على اثره كل من المدعو عبودي و ع وكل منهما يفكر في طريقة جديدة لانهاء خصمه بالضربة القاضية

.............................................
(7)
"اعادة شحن"

 

 تحركت في تمام الساعة مئة على رؤوس اصابعي ومشيت في جنح الليل للالتقاء بقائد كتلة بديعة كفتة (الله يسامحه بابا اصر على اطلاق اسم بديعة كفته على معسكره تخليدا لذكراها)
-ايوه يا حاج انت فين
-تحت الكنبه على ايدك اليمين
-انت طالبني على وجه السرعة ليه احنا مش اتفقنا نصبر شويه لحد الجو ما يهدى
-ايوه ايوه لكن لازم ندرس الخسائر ونعيد ترتيب وضعنا علشان الحركة القادمة
-حركة ايه يا حاج بعد حرب العصابات اللي اتورطنا بيها دي يعني مالقيتش غير بديعة كفتة
-انا كل ما افتكر اللي حصل افطس على نفسي من الضحك
-طبعا دي كانت جنازة والنسوان شبعت فيها لطم
-فاكرة منظر بديعة وهي بتجري ورا امك بالزنوبة وامك بتستخبى تحت طربيزة السفرة
-ده كان في الجولة الاولى يا حاج في الجولة التانية بقى خدت بتارها
-تالت ومتلت دي سنانها لسه معلمة في غوايش بديعة اللي لقيناهم تحت الانقاض
-انا كان نفسي اعرف النسوان وفرقة حسب الله جوم منين النسوان تصوت وتعدد والفرقة تزغرد وترد عليهم تقولش شجيعة في ماتش الاهلي والزمالك
-الغريب بقى انهم اختفوا فجأة ولا كأنهم كانوا هنا
-ده انا لقيت على الارض لب وسوداني يا حاج وواحد من العيال السريحة النهاردة وقفني في الشارع ويقولي مش انتم عيلة التوتي برضه بتفتحوا الجمعة!
-تفتكري التذكرة وقفت عليهم بكام
-انت بتهزر يا بابا
-كان نفسي اخد صورة لامك وهي في البوكس واذلها مرة من نفسي
-ده مش وقته خالص دلوقت
-يعني ايه انصحني يا كابتن ينوبك ثواب
-بص يا باشا ان تخسر المعركة لا يعني بالضرورة خسارة الحرب والعبرة في اللي يخرج منها باقل خسائر ممكنة وخدها حكمة من العبد لله الناس دول جبابرة وما يقدر عليهم الا الجبار
-ونعم بالله يعني اتنازل
-قدم القليل علشان تاخد الكتير ولزوما تقبل الهدنة وتقبل بالرجوع الى طاولة المفاوضات

-يعني عقلت يا عبد الصمد وهتسمع الكلام
-خلاص يا عقيلة ولو انه اللي بتعمليه ده جنان رسمي انما انا باقي على العشرة والعيال اللي في وسطينا
-هتبني الحيطة يا عبد الصمد
-اهئ اهئ امري لله يا عقيلة اعملي حيطة واقسمي العرب عربين وان شا الله تولعوا بجاز
-انا هاخد حمادة وتوتو وسندس والسيد قشطة وانت يفضل معاك محمود ومراته وهدى
-اشمعنى وعلى اي اساس التحيز ده انا لا اوافق
-العيال دول صغيرين ومحتاجين متابعة لمذاكرتهم انت مش هتقدر عليهم يا عبد الصمد
-معاك حق طيب والمصروف والفواتير والمعيشة
-كله اتحسب خلاص وهتوصلك نسختك من الميزانية
-خلاص كله انتهى كله راح ده جنان جنااااان

.............................................
(8)
"الالتفاف حول الحيطة!"

 

 

الحكاية ماخلصتش على كده وطبعا كلنا عارفين عبد الصمد صاحب مبدأ لا يأس مع الحياة ولا حياة مع الحيطة!
والمقرر من باقي الخطة كان يتمثل في مطاوعة عقيلة والسير على خطى الهدنة واللعب بشويش حتى اللحظة المناسبة وعدى على الحكاية دي اسبوعين قبل ما السيد بابا يقرر اعادة المحاولة والكر مرة اخرى على كتلة الشمال!
- ده كده حرام اللي بتعمله امك ده اسمه تخريف
- ليه بس يا بابا عملت ايه المرة دي
- دي عملها اسود ومطين بخروب بايت تصوري بقالي تلات ايام بشم ريحة الاكل بتخرم نخاشيش مناخيري لا ومش اي اكل ده انا اكاد اجزم من الريحة اللي انا شمتها انه البطة الفيومي اللي كانت بتسبح في صينية البطاطس كانت بتنده عليا وتكايدني ولا الملوخية كانت هالكة نفسها من العياط وهي بتغنيلي يا وحشني ولا الرقاق باللبن اعد ايه واوصف ايه وبالعند فيا تبعتلي السيد قشطه يغظني وهو عمال يتمايل وكرشته متدلدله بتمسح بالبلاط والزفر بيشر من حنكه
- وليه حكمت انها بتغيظك مش جايز العيال هي اللي طلبت الاصناف دي بالذات
- بنت ما تحاوليش الجريمة لابساها لابساها مش قادر اصدق بعد العمر ده كله هانت عليها العشرة خلاص وبتذلني بالطريقة الرخيصة دي
- اجمد اومال يا حاج اضبط نفسك احنا محتاجين لكل عصبونة في دماغك علشان الخطوة الجاية
- معاك حق وده اللي انا مركز بيه دلوقت الخطوة الجايه لازم تكون هي القاضية
- خلي بالك يا بابا الخصم جامد ومش سهل
- ولو نحن لها بس احنا ناويين على ايه بالضبط يا كابتن؟

.............................................

(9)يتبع الجزء التاني

عائلة التوتي بعد الجدار الفاصل.......