من حوالي شهر كده احتجت اخلص شوية شغل في مصلحة تجاري. وناس حبايبنا دلوني على شركة قطاع خاص علشان اعملها، ورحت فعلا وخلصتها وكنت مبسوطة قد ايه انه ماحصلش عركسة والخدمة كانت تمام التمام ده حتى الموظفين اللي عندهم حاجة تشرح.. اقولكم ازاي، في اول العمارة اللي فيها الشركة وجنب اليافطة اللي عليها اسم الشركة فيه يافطة اصغر شويه مكتوب عليها حاجة كده زي ماتقولوا سياسة الشركة بتقول " ان الاستثمار الحقيقي هو الاستثمار الذي يوضع في العقول النيرة والايدي النشيطة".. انا صحيح الاول مافهمتش يقصدوا ايه بس مش مهم. واول مادخلت الهول بتاع الشركة انشكحت اساريري من النظافة اللي همه فيها مكان نظيف وناس حلوه ومستحمية ولابسه هدوم جميلة وكل واحد حاطط بتاعه عليها اسمه والريحة زي الفل.. وقرب مني راجل حلو كده في ايده نشره راح معكمهالي وقالي: اتفضلي يا افندم نخدمك بايه؟
ومافيش هي اقل من ساعة كنت مخلصة كل شغلي عندهم. ولما جيت امشي جاني موظف تاني مسبسب وحلو برضه ومبتسم ابتسامة عريضة وقالي: هه ياهانم كله تمام؟ بس ياريت حضريتك ما تنسيش لازم تروحي المصلحة اللي تبع الحكومة علشان تخلصي بقية الاجراءات. ودي حاجة مابتخودش وقت.
شكرته جامد وانا ااااخر انبساط وقلت ماشي اروح المصلحة بكره...
الساعة عشره الصبح كنت عندهم، واول مادخلت لقيت زحمه ودوشة وقعدت اكتر من خمس دقايق وانا بدور على حد يقولي اروح فين علشان الموضوع بتاعي لحد ما واحد من المراجعين الله يكرمه قالي اطلع الدور التالت.. وطبعا مافيش اسنسير لانه عطلان... ماعلينا، دخلت الهول ومش عارفه كان فيه ريحة غريبة وطبعا زحمة برضه وزيادة كان البلاط لونه عجيب وكانه جار عليه الزمن وقلت لنفسي جايز عامل النظافة ماجاش النهارده... وعلشان ابتدي بالموضوع بتاعي كان لازم اوقف في الطابور اللي حسيت انه اوله في القاهرة واخره في مرسى مطروح بس اتنيلت ووقفت ماهو الغاوي ينقط بطقيته...
اذن الظهر وانا لسه واقفة في الطابور المنيل ساعة اريح على رجلي اليمين وساعة على رجلي الشمال وكانت ركبي نملت خلاص والناس اللي ورايه واللي قدامي اشي فرش وقعد على البلاط واشي عمال يتساير واللي بيتكلم في المحمول... وشويه ودخلت بنت استغفر الله العظيم لابسه المحزق والملزق وربنا اعلم دخلت الجينز اللي هي لابساه ازاي وعامله شعرها كوكو وخدت الطابور من اخره لاوله وكانه مافيش ناس طافحه الكوته من الصبح وواقفة هنا ولما وصلت للموظف همستله بمياصه: يااستاذ معلش تمشيني؟ راح ظابط نفسه وابتسم ابتسامة عريضة واختفت الثمنية وثمانين اللي كانت بين عينيه من الصبح واتفرد وجه المجعلص اللي ماينفعش فيه مكوى وقالها: طبعا يافندم انت تؤمري، ارتاحي هنا دقيقة. ووقفت متقصوعة قريب منه وانا مفنجله عينيه في الجوز دول مش مصدقة اللي بيحصل قدامي. وسمعت الراجل اللي ورايه بيقول " لا حول ولا قوة الا بالله". هو ده بس اللي ربنا قدرنا عليه اللي مافيه حد في الطابور عمل حاجة. وبعد شويه الموظف ناداه لها وقال: يا موضوموزيل اتفضلي. وكان فيه دماغ وطارت، وزعقتله: يااستاذ يااستاذ ايه ده مايصحش كده. راح باصصلي بقرف ولاعبرني بكلمة حتى. سبت الطابور ونطيت على البنت المايصه اللي قدامه زقيتها ووقفت مكانها. احمر وجهه وزعاقلي مايصحش كده ياست..
هو انت خليت فيها يصح ولا مايصحش
ابعدي كده ياوليه اوقفي في الطابور
انا وليه يا ابن الهبله ده انت لاطعني في الطابور من امبارح وكل شويه تمشي واحد قدامي انا والغلابه دول
ياست اوعي كده وارجعي الطابور. ياحسني ياحسني...
والله لما تنده لمين ماانا عاتقاك النهارده حتمشيني ياله ولا لأ
لا مش حمشيكي وحمشي كل الناس دي قبلك
ليه ياروح نينه هو انا لازم البس من غير هدوم علشان اعجب
بس ياوليه بس بقولك...
ودخلت الرجاله والستات اللي في الطابور بقى اللي يقول معلش ياست عديها واللي يقول الطيب احسن واللي يقول صلي على النبي... والموظف مبحلقلي بغيظ وقالي: امشي يا وليه لاحسن انده الامن واتهمك بالتعدي على موظف رسمي اثناء تأدية واجبه..
واجبه ياابن الهبله هو الحكومة مشغلاك تبصبص وتفتري وتقبض مرتب اخر كل شهر طيب والله ماانا سيباك... ورحت قالعه الشبشب وعلى قرمة نافوخه هو واللي خلفوه وفين يوجعك وهو يلطم ويعدد ويقول: انا اصطبحت في وجه مين النهارده.. وراحت البنت المايصة متسحبه يافكيك رحت وخدها فم معاه والنسوان اللي ورايه تزغرد...............
بالذمة مش كانوا يستاهلوا العلقة اللي خدوها!!
